Dástúrli sadaq atýdan Qazaqstannyń álemdik básekedegi deńgeıi qandaı
ASTANA. KAZINFORM – Qazaqstannyń dástúrli sadaq atýshylary VI Dúnıejúzilik kóshpendiler oıyndarynda tórt medal jeńip aldy. Onyń ishinde Ortalyq Azııa sanaty boıynsha altyn jáne kúmis júlde bar.
Dástúrli sadaq atýdyń qazirgi jaı-kúıin Jibek Joly telearnasynyń «Búgin.LIVE» baǵdarlamasynda Respýblıkalyq dástúrli sadaq atý federatsııasynyń prezıdenti Nartaı Aralbaıuly aıtyp berdi.
Onyń aıtýynsha, bıylǵy Kóshpendiler oıyndarynda dástúrli sadaq atýdan Qazaqstan atynan úsh er jáne úsh áıel sportshy baq synaǵan. Qurama músheleri reıtıngke qarap emes, arnaıy irikteý jarysynyń qorytyndysy boıynsha tańdalǵan.
– Biz maýsym aıynda Astana qalasynda dástúrli sadaq atýdan chempıondar lıgasyn ótkizdik. Júlde qory 5 mln teńgeden astam boldy. Birinshi oryn alǵan er adam men áıelge 1 mln 300 myń teńgeden, ekinshi oryn ıelerine 700 myńnan, úshinshi oryn alǵandarǵa 500 myń teńgeden aqshalaı syılyq berildi. Sol jerde úsh er jáne úsh áıel sportshyny tańdadyq. Reıtıngke qaramaı, ulttyq quramanyń eń myqtylaryn iriktedik, – dedi Nartaı Aralbaıuly.
Federatsııa prezıdentiniń aıtýynsha, Kóshpendiler oıyndaryna Qazaqstannan barǵan alty sadaqshynyń tórteýi júldeli oryn alǵan.
– Alty sportshymyzdyń tórteýi júldeli oryn aldy. Ortalyq Azııa sanaty boıynsha altyn da, kúmis te bizde. 55 memlekettiń arasynan tórt medal alyp ketý – biz úshin úlken jetistik. Jalpy esepte de top jaryp otyrmyz, – dedi ol.
Qazaq sadaqshylary halyqaralyq jarystarda da top jaryp júr
Nartaı Aralbaıulynyń aıtýynsha, Qazaqstannyń dástúrli sadaq atýdan halyqaralyq arenadaǵy nátıjesi sońǵy jyldary jaqsaryp keledi.
Ótken jyly Koreıada dástúrli sadaq atýdan halyqaralyq kýbok ótip, onda Qazaqstan sportshysy altyn medal jeńip alǵan. Budan keıin Indonezııada 200 metrlik nysanaǵa atýdan ótken jarysta qazaqstandyqtar eki altyn medal jáne bas júldege ıe bolǵan. Al Túrkistanda ótken Azııa chempıonatynda Qazaqstan quramasy úzdik nátıje kórsetken.
– Keshe ǵana Túrkııada Fetıh kýbogy ótti. Qarapaıym tilmen aıtqanda, fýtboldaǵy Chempıondar lıgasy qandaı bolsa, Fetıh kýbogy dástúrli sadaq atýdan biz úshin sondaı deńgeıdegi jarys. Komandalyq eseptegi altyn medaldardyń barlyǵyn qazaq sadaqshylary ıelenip, elge alyp keldi, – dedi federatsııa prezıdenti.
Ol Qazaqstan mergenderiniń Kóshpendiler oıyndarynda da óz deńgeıin taǵy bir márte dáleldegenin atap ótti.
– Qazaq sadaqshylary ázirge aldyna qara salyp kórgen joq. Til-kózimiz tasqa. Mergenderimizdiń atqan jebesi nysanaǵa dóp tıe bersin, – dedi Nartaı Aralbaıuly.
Onyń aıtýynsha, halyqaralyq jarystarda qazaq sadaqshylary bir-birimen básekege túsip qalmasa eken degen tilek te jıi aıtylady. Sebebi Qazaqstannyń mergenderi qazir halyqaralyq deńgeıde ózara básekelestikke túsetindeı dárejege jetken.
– Sekseýil sekseýildi uryp qana syndyrady degendeı, qazaq sadaqshysyn jeńetin – qazaq sadaqshysy ǵana, – dedi ol.
Kóshpendiler oıyndarynda áıelder arasyndaǵy jarysta da Qazaqstannyń eki sportshysy fınalǵa shyqqan.
Qazaqstannyń negizgi qarsylastary kimder?
Federatsııa prezıdenti dástúrli sadaq atýdan Qazaqstannyń halyqaralyq arenadaǵy qarsylastarynyń da myqty ekenin atap ótti.
– Biz únemi básekeles komandalardy nazardan tys qaldyrmaımyz. Jylyna keminde bes-alty ret elde jáne shetelde oqý-jattyǵý jıyndaryn ótkizemiz. Bizben únemi úzeńgi qaǵystyryp otyratyn sadaqshylar – Mońǵolııa, Qyrǵyzstan, Majarstan, Koreıa jáne Túrkııa sportshylary. Ásirese Túrkııa sadaqshylarymen márege teń túsip jatamyz, – dedi Nartaı Aralbaıuly.
Onyń aıtýynsha, atalǵan elderdiń sportshylary da jyl saıyn sheberligin arttyryp, jańa nátıjelerge jetip keledi. Sondyqtan Qazaqstan quramasy halyqaralyq jarystarǵa turaqty daıyndyq júrgizedi.
Kóshpendiler oıyndarynan keıin Atyraýda dástúrli sadaq atýdan álem kýbogy ótedi. Oǵan álemniń úzdik sadaqshylary qatysady dep josparlanyp otyr.
Dástúrli sadaq atýdyń ereksheligi nede?
Nartaı Aralbaıuly dástúrli sadaq atýdyń basty ereksheligi – sportshynyń tabıǵı qabileti men emotsııasyn basqara bilýinde ekenin atap ótti.
– Sadaq atý – emotsııany meńgerýdiń, ony ıgerýdiń kórsetkishi. Qalaǵan sátte der kezinde jebeni shúrippeden jiberip úlgerý kerek, biraq artyq emotsııaǵa berilmeý qajet, – dedi ol.
Onyń aıtýynsha, sońǵy jyldary dástúrli sadaq atýdan jarystarǵa bınokl, elektrondy kórsetkishter sekildi zamanaýı quraldar ene bastaǵan. Qazaqstan tarapy bul ózgeristerge qarsy bolǵan.
– Biz qazaq sadaqshylary retinde buǵan qarsy boldyq. Óıtkeni osylaı jalǵasa berse, dástúrli sadaq atý tolyq tsıfrlyq formatqa ótip, óziniń tabıǵı ereksheligin joǵaltýy múmkin. Byltyr Koreıada ótken jarysta halyqaralyq qaýymdastyq osy máseleni talqylap, dástúrli erejelerge qaıta oralý týraly sheshim qabyldady, – dedi federatsııa prezıdenti.
Endi jarystarda sportshylar nysanaǵa atqannan keıin onyń nátıjesin elektrondy quralmen birden anyqtamaıdy. Sadaqshylar ózderi nysanaǵa baryp, jebelerin jınaıdy, al tóreshiler sol jerde nátıjeni esepteıdi.
«Oqtyń nysanaǵa tıgenin óz kózińmen kórý – erekshe sezim»
Nartaı Aralbaıuly dástúrli sadaq atýda sportshyǵa túsetin psıhologııalyq salmaqtyń da joǵary ekenin aıtty.
– Mysaly, siz 60-70 metrden býtanǵa, 40 metrden nysanaǵa nemese 30 metrden jambyǵa atasyz. Jaqynda biz qazaqtyń dástúrli nysanasy – «Oqjetpes» nysanasyn engizdik. Ol álemdik deńgeıde tirkeldi. Indonezııada 200 metrlik nysanaǵa, al kelesi jarysta 300 metrlik nysanaǵa atylýy múmkin. Siz jebeni atqannan keıin qatardaǵy barlyq qarsylasyńyzben birge baryp, oǵyńyzdyń qaı jerge tıgenin kóresiz. Tımegen jebelerińizdi jınaısyz. Naǵyz emotsıonaldyq qysym nemese kerisinshe emotsıonaldyq ústemdik sol kezde seziledi, – dedi ol.
Federatsııa prezıdenti dástúrli sadaq atýdyń osyndaı tabıǵı erekshelikterin saqtaýdyń mańyzy zor ekenin atap ótti.
– Ulttyq sport – ulttyń ulttyq kody. Biz bul dúnıelerdi neǵurlym kóbirek aıtqan saıyn, qanynda qazaqylyǵy oınaǵan kez kelgen azamattyń ótkenin oılap, bolashaǵyna baǵdar alatynyna senemiz, – dedi Nartaı Aralbaıuly.
Aıta keteıik, buǵan deıin, 30 jyldaı muǵalim bolyp, bir jylda álemniń úzdik sadaqshysy atanǵan shyǵysqazaqstandyq áıel jaıly jazǵan edik.
