Dástúrli sadaq atýda Qazaqstannyń basty qarsylastary kim
ASTANA. KAZINFORM – «Arǵymaq» at-sport kesheni dástúrli sadaq atý saıysy ótip jatyr. Búgin Pýta nysanasyn kózdeýde 33 memleketten 180 sportshy baq synamaq. Qazaqstan atynan 4 áıel jáne 6 er sportshy qatysyp jatyr.
Jarys úsh túrli nysana negizinde ótkiziledi: Pýta nysanasy – erler men áıelderge 70/60 metr, Qalqan nysanasy – 60/50 metr, Jamby nysanasy – 30 metr jáne komandalyq jarys (30 metr) ótedi.
Pýta nysanasynda ár sportshyǵa 7 múmkindikten beriledi, ár múmkindikte 3 mınýt ýaqyt bolady jáne 9 jebe atylady.
Ár tıgen oqqa 1 upaı beriledi, eń joǵry upaı – 63. Upaı sandary teń túsken jaǵdaıda 9 jebemen taǵy bir múmkindik beriledi. Taǵy da teń tússe – nysananyń ortasyna eń jaqyn tıgen oq esepke alynady.
«Sadaq atýdan Qazaqstan qurama komandasy óz babynda tur dep oılaımyn. Bizdiń elde sadaq atý sport bolyp engeli úsh jyldaı boldy jáne qatty qarqyn alyp keledi. Qazir sportshylar sany 5 myńnan sál asady. Búgingi saıysta da júldedi orynǵa úmit bar. Bıyl mamyr aıynda Ystanbul qalasynda ótken jarysta Aıkórkem Batıhan qyzymyz altyn alyp keldi. Bul Álem chempıonatymen parapar oıyn. Ótken jyly Qasymhan Qanat ekinshi oryn alyp keldi. Olarǵa jáne qatysyp jatqan Ulttyq quramanyń 10 sadaqshysyna senim artamyz», - dedi almatylyq federatsııa ókili, jattyqtyrýshy Júkeıhan Málik.
Sonymen birge, spıker elimizdiń basty qarsylasy kimder ekenin aıtyp berdi.
«Sadaq atýda bizge básekeles – Túrkııa, Malaızııa jáne Qyrǵyzstan. Olardyń komandalary óte myqty, ár jarystarda oryn alyp júr. Úsh jylda osylarmen terezemiz teńesip, qarsylas bola aldyq», - deıdi jattyqtyrýshy.
