Dástúrli ónerge shekteý bolǵan: qazir jastarǵa múmkindik mol – Berik Omarov
ASTANA. KAZINFORM – Sońǵy jyldary dástúrli án ónerine degen suranys artyp, jastar arasynda qyzyǵýshylyq kúsheıip keledi. Kontsertter men túrli mádenı sharalarda halyq murasyn nasıhattaýǵa baǵyttalǵan jobalar uıymdastyrylyp jatyr. Bul týraly belgili dástúrli ánshiler, QR mádenıet salasynyń úzdigi Berik Omarov pen Halyq ártisi Aıgúl Qosanova Jibek Joly telearnasynyń «Búgin LIVE» baǵdarlamasynda aıtyp ótti.
– Dástúrli ónerdi nasıhattap júrgen kez kelgen ónerpazdyń mıssııasy joǵary. Qazaq halqynyń ulttyq kody bizdiń tól mýzyka men mádenıetimiz. Sol jolda qyzmet etip júrgen árbir adam halyq ıgiligi úshin eńbek etedi, – dedi Berik Omarov.
Sońǵy ýaqytta dástúrli ánderdi zamanaýı baǵytta oryndap júrgen jas ónerpazdar sany artyp keledi. Alaıda halyq ánderiniń túpnusqasyn saqtaý mańyzdy ekenin halyq ártisi Aıgúl Qosanova erekshe atap ótti.
– Nasıhattaýdyń eń basty sharty – túpnusqadan aıyrylmaý. Ánniń áýeni men mátini – ata-babamyzdan jetken amanat. Olardy ózgertýge eshkimniń quqyǵy joq. Árıne, jastar zamanyna saı jetkizýge, jańa tynys berýge bolady. Biraq ánniń sózin nemese sazyn burmalaýǵa bolmaıdy, – dedi Aıgúl Qosanova.
Ustaz retinde ol jastardyń dástúrli ánge qyzyǵýshylyǵy joǵary ekenin aıtty.
– Bizdiń kezde konservatorııany 5-6 ǵana stýdent támamdasa, qazir bul kórsetkish 20-25-ke deıin jetti. Bul dástúrli ónerge degen súıispenshiliktiń artýynyń aıǵaǵy, – dedi Aıgúl Qosanova.
Berik Omarov ta qazir mýzykalyq bilim alý múmkindigi keńeıgenin atap ótti.
– Buryn shekteýler bar edi. Ár oblystan tek bir ǵana stýdent konservatorııaǵa túse alatyn. Qazir jaǵdaı ózgerdi – Astana men óńirlerde jańa oqý oryndary ashylyp, mýzykalyq fakýltetter jumys isteıdi. Memlekettik granttar sany artty, jastarǵa múmkindik mol, – dedi QR mádenıet salasynyń úzdigi.
Sonymen qatar túlekterdiń jumysqa ornalasý kórsetkishi de jaman emes.
– Byltyr bizdiń oqý ornyn 20 stýdent bitirse, sonyń 18-i jumysqa ornalasty. Demek, dástúrli ánshilerge degen suranys bar dep aıta alamyz, – dedi Aıgúl Qosanova.
Buǵan deıin dástúrli ánge memleket tarapynan qoldaý kerek ekenin jazǵanbyz.
Eske sala keteıik, Astanada 28-29 qarashasy kúnderi qazaqtyń kúı ónerin dáripteýge arnalǵan dástúrli III qalalyq «Astana — kúı qanatynda» atty dombyrashylar festıval-baıqaýy ótedi.