Dástúrli qundylyqtardy saqtaý máselesi Qazan qalasynda ótken Jahandyq jastar sammıtine kóterildi
QAZAN. KAZINFORM – Islam Yntymaqtastyǵy Uıymynyń elderi jastar saıasatyndaǵy ózekti máselelerdi talqylaý úshin Qazanda bas qosty.
Tatarstan astanasy Qazan qalasynda Jahandyq jastar sammıti ótti. Oǵan 50-den astam Islam Yntymaqtastyǵy Uıymy elderinen, sonyń ishinde Qazaqstannan da delegat qatysyp jatyr.
Jıynnyń basty taqyryby – tsıfrlandyrý jáne jastar saıasatynyń zamanaýı tetikteri. Jasandy ıntellekt jáne vırtýaldy shyndyq, jastar arasyndaǵy tsıfrlyq trendter boıynsha sessııalar josparlanǵan.
Jıyn qatysýshylary jahandaný dáýirinde dástúrli qundylyqtardy saqtaý máselesin de talqylady. QR Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Birjan Álimjanov Qazaqstanda bul baǵytta atqarylyp jatqan jumystarǵa toqtaldy.
«Qazaqstanda dala demokratııasynyń dástúrlerin saqtaý úshin 2022 jyldan bastap el Prezıdenti janyndaǵy Ulttyq quryltaıdyń jyl saıynǵy otyrysy ótkizilip keledi. Quryltaı qoǵamdaǵy ártúrli toptardyń, sonyń ishinde jastardyń kúsh-jigerin biriktirý qajet bolǵan jedel ózgerister men jahandyq syn-qaterler dáýirinde erekshe mańyzǵa ıe bolyp otyr», - dedi Birjan Álimjanov.
Sammıt qorytyndysy boıynsha ıslam álemin qoldaýǵa jáne IYU elderiniń jastaryn damytýǵa baǵyttalǵan qarar qabyldanyp, birlesken is-qımyl josparyna qol qoıylady.
