Elordada Astana Finance Day–2025 ótip jatyr
ASTANA. KAZINFORM – Elordada Astana Finance Day – 2025 halyqaralyq forýmy bastaldy.
Jyldyń basty qarjy oqıǵasynyń bıylǵy taqyryby – «Bolashaqtyń negizin qalaıtyn kapıtal». Taqyryp aǵylshyn tilindegi «capital» sóziniń qos maǵynasyn: birinshisi, Astana – Qazaqstannyń astanasy (capital) jáne Shyǵys pen Batys toǵysqan, qarqyndy damyp kele jatqan qarjy ortalyǵy, ekinshisi maǵynasy – ornyqty ósýdiń qozǵaýshy kúshi retinde kapıtaldy (capital) bildiredi.
Álemde kapıtal úshin qyzý báseke kúsheıgen búgingi zamanda qoldaǵy resýrsty utymdy paıdalaný – klımattyń ózgerýinen bastap ekonomıkany ósirýge jáne tehnologııany ilgeriletýge deıingi syn‑qaterdi jeńýdiń negizgi kepiline aınalyp otyr.
- Búgingi damýshy naryqtaǵy ınfraqurylymǵa ınvestıtsııalar taqyrybyna arnalǵan paneldik sessııaǵa qosh keldińizder. Belgili bolǵandaı, damyǵan ınfraqurylym – ekonomıkalyq ósýdiń negizgi qozǵaýshy kúshteriniń biri. Eýrazııanyń dál júreginde ornalasqan Qazaqstan ınfraqurylymdyq damýdy memlekettik saıasattyń negizgi basymdyqtarynyń biri retinde aıqyndap otyr. Biz zamanaýı kólik dálizin quryp, tranzıttik áleýetimizdi damytyp, energetıka men tsıfrlyq tehnologııalarǵa jeke ınvestıtsııany belsendi túrde tartyp kelemiz, - dedi Úkimet basshysynyń orynbasary Qanat Bozymbaev.
Eki kúnge jalǵasatyn Astana Finance Days-te álemniń 70-ten astam elinen 5 000-nan asa qatysýshy, onyń ishinde brokerler, bankırler, ınvestorlar men ınnovatorlardy qosa alǵanda, qarjy jáne tehnologııalyq sektor, sondaı-aq memlekettik jáne kvazımemlekettik sektor ókilderi bas qosyp otyr.
- Damýshy naryq búginde shynymen de jańa ınfraqurylymdyq serpilistiń aldynda tur. Osy turǵyda elimiz halyqaralyq áriptesterge ekonomıkanyń túrli salasynda jańa jobalardy birlesip júzege asyrý úshin biregeı múmkindik usyna alady. Qazaqstan Úkimeti tarapynan senimdi ári boljamdy seriktes taba alasyzdar. Búgin Astana Finance Days aıasynda bastalǵan dıalog uzaq merzimdi yntymaqtastyqqa, jańa jobalarǵa jáne turaqty damýǵa berik irgetas bolaryna senimdimin, - deıdi vıtse-premer.
Halyqaralyq forýmnyń úsh negizgi taqyryptyq baǵyty bar - qarjylyq kapıtal, ınfraqurylymdyq kapıtal jáne ınstıtýtsıonaldyq kapıtal.
Uıymdastyrýshylardyń aıtýynsha, bıylǵy forýmnyń ereksheligi AFD Exhibition Hub – Astana Finance Days biryńǵaı kórme platformasy bolmaq. Ol kapıtal jáne tsıfrlyq ınnovatsııa naryǵynda jumys isteıtin kompanııalardy biriktiredi jáne oń sheshimderdi kórsetýge, naryqtaǵy pozıtsııany jaqsartýǵa jáne strategııalyq seriktestermen tikeleı baılanys ornatýǵa arnalǵan keńistikti usynady.
Aıta keteıik, QMA kommertsııalyq emes uıymdardyń kúdikti operatsııalaryna taldaý júrgizedi.