Dástúr men ınnovatsııa úılesimi: Almaty oblysynda Naýryz jańa formatta toılandy
ALMATY. KAZINFORM – Almaty oblysynda Ulystyń uly kúni «Digital Nauryz» baǵdarlamasy aıasynda jańa formatta atalyp ótti. Negizgi shara Qonaev qalasynda uıymdastyryldy. Jasandy ıntellekt pen tsıfrlyq múmkindikter keńinen qoldanylyp, meıram mazmuny jańa deńgeıge kóterildi.
Ortalyq alańdaǵy robottar kórmesi halyq qyzyǵýshylyǵyn týdyrdy. Aqshańqan kıiz úıler tigilip, tusaýkeser, qyz aıttyrý, súıinshi suraý, bastańǵy, betashar, tós qaǵystyrý, súıek jańǵyrtý jáne basqa da qazaqtyń salt-dástúrlerinen kórinis qoıyldy. Oblys ákimi Marat Sultanǵazıev te ulttyq mádenıettiń jarshysy bolǵan merekege qatysyp, turǵyndardy quttyqtady. Al, Senator Janbolat Jórgenbaev endi ǵana táı-táı basqan balaqaıdyń tusaýyn kesip, bata berdi.
Merekelik sharaǵa qatysýshylardy quttyqtaǵan oblys ákimi aıtýly kúnniń mańyzy jaıly sóz qozǵady.
– Naýryz merekesi – halqymyzdyń baı mádenıeti men izgi dástúriniń tereń máni men ulylyǵyn aıshyqtaıdy. Tabıǵat túlep, tirshilik jańaratyn osy kezeńde adamzat ta rýhanı serpilip, jan dúnıesi jańaryp, úmit pen izgilikke toly erekshe kúıge bólenedi. Osy turǵydan alǵanda, Naýryz – tek mereke ǵana emes, jańǵyrý men jańarýdyń sımvoly. Igi dástúrdi jańa mazmunmen baıytý maqsatynda Memleket basshysy Qasym-Jomart Toqaevtyń bastamasymen Naýryz merekesi jańasha sıpatqa ıe boldy. Meıramdy bir kúnmen shektemeı, mazmunyn keńeıtip, «Naýryznama» tujyrymdamasy aıasynda 10 kúndik merekege aınaldyrý – ulttyq qundylyqty dáripteýdiń jarqyn kórinisi. Búgin biz osy Naýryznama aıasyndaǵy mańyzdy kúnderdiń biri – «Yntymaq kúnin» atap ótýdemiz.
Aıtýly kúnge oraı elimizdiń barlyq óńirinde etnoaýyldar boı kóterip, jármeńkeler uıymdastyryldy. Mádenı jáne sporttyq is-sharalar keńinen ótkizilýde. Naýryz – tek rýhanı jańǵyrý ǵana emes, jańa múmkindikterge jol ashatyn kezeń, - degen Marat Eleýsizuly jyl basy alǵa qoıylǵan maqsattardy aıqyndap, tyń bastamalarǵa serpin beretinin aıtyp, óńirdiń áleýmettik-ekonomıkalyq damýyndaǵy aıtýly nátıjelerge toqtaldy.
Onyń aıtýynsha, úsh jylda óńirdiń ónim kólemi 3,4 trln. teńgeden 6,0 trln. teńgege deıin ósip, respýblıka boıynsha 10-orynnan 5-orynǵa kóterilgen. Ótken jyly negizgi kapıtalǵa 29,4% ósimmen 1 trln. 355 mlrd. teńge ınvestıtsııa tartylǵan. Ónerkásip óndirisiniń kólemi 10,1% ósimmen 2 trln. 598 mlrd. teńgege jetken. Aýyl sharýashylyǵynda jalpy ónim kólemi 798,4 mlrd. teńge bolyp, naqty kólem ındeksi 102,0%-dy quraǵan. Onyń ishinde mal sharýashylyǵynyń ónimi 3,6%-ǵa ósken. Al qurylys jumystarynyń kólemi 18,4%-ǵa kóbeıgen. 1 mln. 69 myń sharshy metr turǵyn úı paıdalanýǵa berilgen. Oblys ákimi munyń barlyǵy óńirimizde júrgizilip jatqan júıeli saıasat pen naqty jospardyń nátıjesinde qol jetkizilgen mańyzdy jetistikter ekenin aıtty. Sonymen qatar eldiń áleýmettik-ekonomıkalyq damýyna úles qosqan azamattardy memlekettik nagradalarmen marapattady.
Іs-shara barysynda sahnada teatrlandyrylǵan qoıylym kórsetilip, Roza Rymbaeva, Nurbolat Abdýllın, Ómirqul Aınııazov, Tamara Asar syndy estrada juldyzdary, «Qońyr» toby, «Qulansaz» ansambli jáne basqa da ónerpazdar halyqqa merekelik kóńil-kúı syılady. Saıabaq aýmaǵynda qolóner sheberleriniń kórmesi, ulttyq oıyndar jáne taqyryptyq aımaqtar jumys istedi. «Jeti qazyna» ınteraktıvti kitaby arqyly ulttyq mura jańa sıpatta dáripteldi. «Face of Nauryz» alańynda kelýshilerdiń beınesi jasandy ıntellekt kómegimen óńdelip, zamanaýı stılde usynyldy. Sondaı-aq robottardyń qatysýymen qyzyqty baǵdarlama uıymdastyryldy. Tipti qultemirler baýyrsaq pisirip, turǵyndarǵa usyndy.
Jalpyhalyqtyq merekege aınalǵan Ulystyń uly kúni osylaıshy Almaty oblysynda keń kólemde toılandy. Qonaev qalasyndaǵy ortalyq alańǵa 5 myńnan astam halyq jınalyp, merekelik shara «Digital Nauryz» tujyrymdamasyna saı tikeleı efırde kórsetildi.
