Dastan Sátpaevtyń «Chelsı» sapyndaǵy alǵashqy goly eń úzdik dep tanyldy
ASTANA. KAZINFORM – Qazaqstan quramasynyń 17 jastaǵy shabýylshysy Dastan Sátpaevtyń Londonnyń «Chelsı» sapyndaǵy alǵashqy goly Atsstralııada ótken Sydney Super Cup maýsymaldy týrnıriniń eń úzdik goly dep tanyldy, dep habarlaıdy informsports.kz.
Sátpaev bul goldy «Ýestern Sıdneı Ýonderers» komandasyna qarsy matchta soqty. Ol alańnyń ortasynan berilgen pasty qabyldap, qarsylas qorǵaýshylarynan ozyp shyǵyp, dál soqqymen dopty qaqpaǵa toǵytty. Bul gol Sátpaevtyń ǵana emes, bas bapker Habı Alonsonyń da «Chelsı» sapyndaǵy alǵashqy doby bolatyn.
Týrnırdiń úzdik goldary reıtınginde ekinshi orynǵa «Tottenhem» shabýylshysy Matıs Teldiń «Sıdneı» qaqpasyna aıyp dobynan soqqan goly jaıǵasty.
Úshinshi oryn Aıdan Hemmondtyń «Chelsıge» soqqan golyna buıyrdy. Tórtinshi orynǵa «Chelsı» jartylaı qorǵaýshysy Darıý Essýgýdyń doby endi. Bul shabýyldyń bastalýyna Sátpaev ta qatysqan.
Besinshi orynda Dılan Tsıklýnanyń «Chelsıge» soqqan goly bolsa, altynshy orynǵa londondyq klýbtyń vıngeri Djeımı Baıno-Gıttenstiń dál soqqysy kirgen.
Aıta keteıik, Dastan Sátpaev Aýstralııadaǵy týrnırde «Chelsı» sapynda eki matchqa qatysty. «Ýestern Sıdneı Ýondererske» qarsy kezdesýde gol soqqannan keıin ol «Tottenhemmen» oıynda alańǵa ekinshi taımda qosyldy.
17 jastaǵy qazaqstandyq fýtbolshy Dastan Sátpaev «Chelsı» sapyndaǵy jańa maýsym aldyndaǵy alǵashqy resmı joldastyq matchtarda-aq ózine nazar aýdartty. Kazinform tilshisi jas talanttyń London klýbyndaǵy negizgi básekelesterin jáne onyń Anglııa Premer-lıgasyndaǵy debıýt jasaý múmkindigin saralady.
