Dastan Sátpaevty «Qaıratta» kim almastyra alady
ASTANA. KAZINFORM – Almatylyq «Qaırat» komandanyń 17-jastaǵy kóshbasshysy Dastan Sátpaevtyń ornyn kimniń almastyraty belgili boldy.
Keıingi jyldary el fýtbolynda ózindik órnegin salǵan jas fýtbolshy óziniń tól komandasymen keremet nátıjemen qoshtasty. Ol Qazaqstan Premer-lıgasy HVІІ týrynyń aldyn ala ótkizilgen oıynynda Petropavldyń «Qyzyljar» qaqpasyna eki golmen kózge tústi.
Endi ol Anglııa astanasy — London qalasyna attanýǵa daıyndalady. Onda Anglııa Premer-lıgasyndaǵy «Chelsı» komandasy quramyna qosylady. Jas fýtbolshy jaqynda londondyq klýb tizginin ustaǵan ıspanııalyq maman havı Alonsoǵa óziniń sheberligin dáleldeı bilýi tıis.
Sol arqyly komandanyń negizgi quramyna iligýine tolyq múmkindigi bar.
Qazir jankúıer tarapynan Dastan Sátpaevtyń aldaǵy jeke ómiri, mansabyna qatysty qyzyǵýshylyq bar. Onyń mansabynyń londondyq kezeńi qalaı jalǵasady? Ony aldaǵy ýaqytta anyqtaıtyn bolamyz.
Bul ýaqytta almatylyq klýb aldaǵy oıyndarda Dastan Sátpaevty kim almastyrady degen saýalǵa qatysty jospar bar. Máselen, komandany Qazaqstan chempıonatynda mańyzdy oıyndar kútip tur, oǵan qosa jaqyn ýaqytta Chempıondar lıgasynyń irikteý kezeńi bastalady.
Bas bapker Rafael Ýrazbahtın óziniń sózinde komanda úshin Dastan Sátpaev úlgi bolyp qala beretinin atap ótti.
— Meniń oıymsha, bizdiń akademııada uzaq ýaqyt boıy ol úlgi boldy. Bireý úshin bul arman, biraq ol armannyń shyndyq bolýy múmkin ekenin kórsetti. Siz eshteńeden qoryqpaýyńyz kerek, batyl oınap, ózińizdi kórsetińiz. Jas jigitterge keletin bolsaq, qazir biz olarǵa kóbirek oıyn ýaqytyn beremiz, kóbirek mınýt beremiz, óıtkeni Dastan bizden ketedi, oryn bosaıdy. Bul shepte legıoner nemese qazaqstandyq oıynshy bolýy mańyzdy emes, eger ol talapqa sáıkes kelse, jetip jatyr. Eskeretin jalǵyz nárse bar. Men ol jaıynda jas fýtbolshylarmen sóıleskende aıtamyn. Olar gol soǵyp nemese pas berse de bosańsymaýy kerek, — dedi Rafael Ýrazbahtın.
Sátpaevtyń ornyn almastyrýy múmkin oıynshylar qatarynda jaqynda «Qaıratqa» qosylǵan 30-jastaǵy ıspanııalyq Mark Gýaldy atap ótemiz. Negizinde ol — Dastan sekildi ortalyq shabýylshy. Ýrazbahtınniń aıtýynsha, qazir jańadan kelgen fýtbolshy komandaǵa beıimdelip, formasyn belsendi túrde qalpyna keltirýge kóńil bólip otyr.
— Biz oǵan árbir oıynda kóbirek ýaqyt berýge kóńil bólip kelemiz. Meniń oıymsha, eki aptadan keıin ol tolyq qalpyna keledi. Bul fýtbolshy Chempıondar lıgasynyń matchtaryna deıin talapqa saı keledi dep úmittenemin. Sondaı-aq, ol bilikti oıynshy, ol ózin jaqsy qyrynan tanyta alady, ózi oınaǵan eki matchta sheberligi joǵary ekenin kósretti. Meniń oıymsha, aldaǵy ýaqytta goldar soǵa alady. Biz onyń komandaǵa kelgenine qýanyshtymyz, bizdiń mindetimiz — ony fýtbolǵa birtindep engizý. Ol Polshanyń «Legııasynda» oınady jáne sol jerde tájirıbesin arttyrdy, — dedi Rafael Ýrazbahtın.
