Dastan Sátpaev UEFA Chempıondar lıgasynda gol soqqan eń jas oıynshylar úshtigine kirdi

ASTANA. KAZINFORM — Almatylyq «Qaırat» komandasynyń shabýylshysy Dastan Sátpaev UEFA Chempıondar lıgasynda gol soqqan eń jas oıynshylar úshtigine kirgeni habarlandy.

Qazaqstandyq fýtbolshy búgin Chempıondar lıgasy negizgi kezeńiniń besinshi týrynda 81-mınýtta Danııanyń «Kopengagen» komandasy qaqpasynan sańylaý tapty. Nátıjesinde ol Chempıondar lıgasynda gol soqqan eń jas oıynshylardyń úshtigine kirdi. Búgin onyń dúnıege kelgenine 17 jas 105 kún tolyp otyr.

Bul tizimde kósh basynda ıspanııalyq Ansý Fatı tur. Ol ıspanııalyq «Barselona» sapynda 2019 jyly Italııanyń «Inter» qaqpasyna gol soqqan sátte 17 jas 40 kúnge tolǵan edi. Ekinshi orynda «Barselonanyń» taǵy bir juldyzy Lamın ıAmal (17 jas, 68 kún) enshilep keledi. Lamın 2024 jyly «Monako» qaqpasyn dál kózdedi.

Al qazirge deıin úzdik úshtikte belgııalyq «Antverpen» shabýylshysy Djordj Ilenıhena turǵan edi. Ol «Barselonanyń» qaqpasyna gol soqqan ýaqytta dúnıege kelgenine 17 jyl 119 kún tolǵan edi.

Aıta ketsek, búgin «Qaırat» Chempıondar lıgasy negizgi kezeńiniń besinshi týrynda Danııanyń «Kopengagen» klýbyna 2:3 esebimen jol berdi.

Osydan buryn «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2 esebimen jol berse, Kıprdiń «Pafosymen» 0:0 esebimen teń tústi.

Endi qazaqstandyq klýb odan keıin 9 jeltoqsanda Astanada Grekııanyń «Olımpıakos», 2026 jyldyń 20 qańtarynda Belgııanyń «Brıýgge» klýbyn qabyldasa, 28 qańtarda Anglııanyń «Arsenal» komandasymen sheberlik baıqasady.