Dastan Sátpaev óner kórsetetin «Bernlı» maýsymdaǵy alǵashqy jeńisine qol jetkizdi
ASTANA. KAZINFORM – Qazaqstan quramasynyń shabýylshysy Dastan Sátpaev óner kórsetetin aǵylshynnyń «Bernlı» klýby Chempıonshıptiń toǵyzynshy týrynda «Ýotfordty» iri eseppen jeńdi, dep habarlaıdy Sports.kz.
Kezdesý «Bernlıdiń» 4:0 esebimen jeńiske jetýimen aıaqtaldy.
Matchtyń alǵashqy taımynda qonaqtar úsh gol soqty. 13-mınýtta ıAkýb Brýýn Larsen esep ashsa, 19-mınýtta Zekı Amdýnı basymdyqty arttyrdy. Al 25-mınýtta Reo Hatate úshinshi goldy qarsylas qaqpasyna engizdi.
Ekinshi taımda da «Bernlı» oıyn tizginin óz qolynda ustady. Kezdesýdiń 87-mınýtynda Markýs Edvards buryshtama dobynan keıin ádemi gol soǵyp, matchtyń qorytyndy esebin belgiledi.
Jaraqatynan aıyqqan Dastan Sátpaev osy oıynǵa qatysatyn fýtbolshylar tizimine engizildi. Qazaqstandyq shabýylshy kezdesýdi qosalqy quramda bastap, 74-mınýtta ıAkýb Brýýn Larsenniń ornyna alańǵa shyqty.
Ol oıynǵa qosylǵan sátte «Bernlı» qarsylasynan úsh dop aıyrmasymen basym túsip jatqan bolatyn.
– Bul jeńis «Bernlı» úshin Chempıonshıptiń bıylǵy maýsymyndaǵy alǵashqy tabys boldy. Komanda toǵyzynshy týrda «Ýotfordty» syrt alańda 4:0 esebimen jeńdi. Dastan Sátpaev jaraqatynan keıin alańǵa qaıta oralyp, matchtyń sońǵy bóliginde óner kórsetti. Qazaqstandyq fýtbolshy 74-mınýtta oıynǵa qosyldy, – dep jazdy Sports.kz.
Osy jeńisten keıin «Bernlı» jeti upaı jınap, týrnır kestesinde bir saty joǵary kóterildi. Degenmen komanda ázirge 23-orynda qalyp, tómengi dıvızıonǵa túsip qalý qaýpi bar aımaqta tur.
Aıta keteıik, buǵan deıin Dastan Sátpaevtyń úzilisten keıin Anglııada jattyǵýǵa qaıta kiriskeni habarlanǵan bolatyn.
