Dastan Sátpaev matchtyń úzdik oıynshysy atandy
ASTANA. KAZINFORM – «Bernlı» Anglııa Chempıonshıpynyń tórtinshi týrynda óz alańynda «Mıdlsbromen» teń tústi, dep habarlaıdy Sports.kz.
Bernlıdegi «Terf Mýr» stadıonynda ótken kezdesý 1:1 esebimen aıaqtaldy.
23-mınýtta Eıden Morrıs gol soǵyp, «Mıdlsbrony» alǵa shyǵardy. Al 54-mınýtta ıÝgo Ragýber alań ıeleriniń tarazy basyn teńestirýine kómektesti.
«Bernlıdiń» qazaqstandyq shabýylshysy Dastan Sátpaev negizgi quramda alańǵa shyǵyp, 80-mınýtta almastyryldy.
«Sport Shredıngera» Telegram arnasynyń málimetinshe, Dastan alańda ótkizgen 80 mınýt ishinde qaqpaǵa 2 ret soqqy jasap, 18 pastyń 17-sin dál jetkizgen. Sondaı-aq dopqa 31 ret tıip, 4 jekpe-jektiń úsheýinde jeńiske jetti jáne bir ret dopty sátti tartyp aldy.
Dastan alańnan jankúıerlerdiń qoshemetimen shyqty.
Oıyn qorytyndysy boıynsha Dastan Sátpaev «Mıdlsbroǵa» qarsy matchtyń úzdik oıynshysy atandy. Bul týraly «Bernlı» klýby da resmı paraqshasynda habarlady.
Aıta keteıik, Sátpaevtyń komandasy ázirge chempıonatta jeńiske jete almaı keledi. «Bernlı» eki ret teń túsip, eki ret jeńilgen.
Dastan Sátpaev «Bernlı» sapynda tórt match ótkizdi. Onyń úsheýi Chempıonshıpta, bireýi Anglııa lıgasy kýbogynda ótti.
Buǵan deıin «Bernlı» klýby «Mıdlsbroǵa» qarsy matchtyń afıshasyna Dastan Sátpaevty tańdaǵany habarlanǵan.
Sondaı-aq Dastan Sátpaev «Bernlı» sapyndaǵy alǵashqy tolyq matchyn ótkizgenin jazdyq.
