Dastan Sátpaev klýbty ǵana emes, eldi tanytady dep senemiz – «Qaırat» bapkeri

ALMATY. KAZINFORM — «Qaırat» fýtbol klýbynyń ókilderi «Real Madrıdke» qarsy oıyn aldynda Almatynyń óńirlik kommýnıkatsııalar qyzmetinde brıfıng ótkizdi. 

BAQ ókilderiniń suraǵyna jaýap bergen Rafael Ýrazbahtın 17 jastaǵy shabýyldaýshy Dastan Sátpaevtyń komanda úshin qanshalyqty mańyzdy ekenin aıtty.

— Biz ádeıi Dastanǵa baǵyttap taktıka qurmaımyz. Biraq ol óte mańyzdy oıynshy, tek bizdiń komanda úshin ǵana emes, búkil Qazaqstan úshin deýge bolady. Keıingi ýaqytta bizde mundaı jarqyn jas oıynshy bolmaǵan. Sondyqtan barlyǵymyz onyń ári qaraı damyp, tek «Qaırat» klýbyn emes, eldi de tanytatynyna senemiz. Ony basqalardan bólip qarastyrmaımyz, komandalyq oıyndy jalǵastyramyz. Ol áli talaı gol soǵatynyna úmittenemiz. Ol shabýylshy, gol soǵý óte mańyzdy, bul — onyń jumysy. Ózi de uzaq ýaqyt gol soqpaı qalsa, qatty ýaıymdaıdy. Aldaǵy oıynda bizdi qýantatyn gol syılasa deımiz, — dedi bapker.

Eske salaıyq, el birinshiligi aıasynda «Jeńiske» qarsy ótken oıynda Dastan Sátpaev eki gol soǵyp, komandasyna jeńis syılady.