Dastan Sátpaev Qazaqstan fýtboly tarıhynda rekord ornatty
ASTANA. KAZINFORM — Almatylyq «Qaırat» klýbynyń shabýylshysy Dastan Sátpaev Qazaqstan ulttyq quramasy tarıhynda biregeı nátıjege qol jetkizdi.

Dastan Sátpaev fýtboldan 2026 jylǵy álem chempıonatynyń irikteý týrnırinde Ýelspen ótken matchta 74-mınýtta alańǵa shyqty.
Ol 16 jas 7 aıǵa tolǵan merzimde Qazaqstan ulttyq quramasy sapynda alǵashqy oıynyn ótkizip, rekord ornatty.
Budan buryn úzdik kórsetkish Jambyl Kókeevke (17 jas 4 aı) tıesili edi.
«Qaırat» fýtbol akademııasynyń túlegi 2024 jyldyń qarasha aıynda londondyq «Chelsı» klýbynda qaralymnan ótti. Bıyl aqpanda «Chelsı» ony 4,3 mln eýroǵa satyp aldy, bul Qazaqstan fýtboly tarıhynda rekord bolyp esepteledi. Kelisimshart 5 jylǵa eseptelgen. Biraq 18 jasqa tolǵansha Dastan «Qaıratta» qalady.
Bıyl 2 naýryzda Dastan Sátpaev «Astanamen» ótken oıynda 37-mınýtta jaraqat alǵan Elder Santananyń ornyna shyǵyp, Qazaqstan chempıonatyndaǵy alǵashqy golyn soǵyp, tarazy basyn teńestirdi.
Dastan Sátpaev — sondaı-aq 17 jasqa deıingiler arasynda Qazaqstan ulttyq quramasynyń kapıtany.
Eske sala keteıik, budan buryn Qazaqstan — Ýels matchynda birinshi taımda Ashat Taǵybergenniń tarazy basyn teńestirgenin jazǵan bolatynbyz.
Fýtboldan álem chempıonatynyń irikteý týrnırinde Qazaqstan Ýels komandasyna ese jiberdi.