Dastan Sátpaev qashan 90 mınýt oınaýǵa daıyn bolady
ASTANA. KAZINFORM – Aǵylshyndyq «Bernlı» klýbynyń bas bapkeri Nıkı Haıen qazaqstandyq shabýylshy Dastan Sátpaevtyń jaraqattan keıingi jaǵdaıy men alańǵa tolyq oralý jospary týraly aıtty, dep habarlaıdy INFORMSPORTS.
18 jastaǵy qazaqstandyq fýtbolshy sannyń artqy bulshyqetinen alǵan jaraqatynan keıin birtindep oıyn babyna kelip jatyr.
Sátpaev «Ýotfordqa» qarsy kezdesýde alańǵa qosalqy quramnan shyǵyp, 20 mınýt oınady. Keıin fýtbolshynyń transferlik quqyǵyna ıe londondyq «Chelsı» klýby onyń «Charltonǵa» qarsy matchqa qatysýyna ruqsat bermedi.
Al «Výlverhemptonmen» ótken kezdesýde qazaqstandyq shabýylshy shamamen 30 mınýt oınady. Bul matchta «Bernlı» 1:2 esebimen jeńilis tapty.
Nıkı Haıen Sátpaevtyń komanda úshin mańyzdy oıynshy ekenin atap ótti.
«Dastan jaraqat aldy. «Výlverhemptonǵa» qarsy kezdesýde ol 30 mınýt oınaı aldy. Onyń jyldamdyǵy joǵary, qarqyny jaqsy, energııasy mol jáne jeke sheberligi erekshe. Sondyqtan ol bizdiń komanda úshin óte mańyzdy fýtbolshy», – dedi Haıen Burnley Express basylymyna.
Bas bapker qazaqstandyq shabýylshynyń aldaǵy ýaqytta oıyn ýaqytyn kezeń-kezeńimen arttyrýdy josparlap otyrǵanyn jetkizdi.
«Ol endi 30 mınýttan kóbirek oınaı alady dep úmittenemin. Aldymen 45 mınýt, keıin 60 mınýt oınaıdy. Sodan soń tolyq 90 mınýt ótkizýge daıyn bolady dep oılaımyn», – dedi maman.
Haıenniń aıtýynsha, sońǵy kezdesýde Sátpaevqa oıynǵa birden aralasyp ketý ońaı bolmaǵan. Ásirese komanda jeńilip jatqan sátte qysym kúsheıip, fýtbolshynyń óz múmkindigin tolyq kórsetýi qıyndaı túsedi.
Soǵan qaramastan, «Bernlı» bapkeri jas qazaqstandyqtyń áleýetine senim bildirip, onyń aldaǵy matchtarda óz sheberligin kórsetetinine kúmán keltirmeıtinin aıtty.
«Bernlı» kelesi kezdesýin syrt alańda «Lınkoln Sıtıge» qarsy ótkizedi. Bul matchta Dastan Sátpaevtyń alańdaǵy ýaqyty ulǵaıýy múmkin. Alaıda ázirge qazaqstandyq shabýylshy tolyq 90 mınýt oınaýǵa daıyn emes.
Aıta ketelik «Bernlı» bapkeri Dastan Sátpaevqa qatysty «Chelsıdiń» sheshimine narazylyq bildirgen edi.
