Dastan Sátpaev fýtboldan Qazaqstan quramasynyń Belarýspen oıynyna qatyspaıdy
ASTANA. KAZINFORM — Jartylaı qorǵaýshy Dastan Sátpaev fýtboldan Qazaqstan quramasynyń aldaǵy Belarýspen joldastyq kezdesýine qatyspaıdy.
Ulttyq quramanyń bapkerler shtaby osyndaı uıǵarymǵa keldi. Ol aldymen ulttyq quramanyń oqý-jattyǵý jıynyna qatysady. Odan keıin Qazaqstan 21 jasqa deıingi jastar quramasyna qosylyp, 2027 jylǵy Eýropa chempıonatynyń irikteý kezeńi aıasynda Andorraǵa qarsy matchqa daıyndalady.
Sodan keıin Dastan qaıtadan ulttyq quramanyń sapyna oralyp, Soltústik Makedonııaǵa qarsy kezdesýge ázirlikti jalǵastyrady.
Ulttyq qurama 5 maýsymda Belarýspen joldastyq kezdesý ótkizse, 2026 jylǵy álem chempıonaty irikteý kezeńindegi kezekti oıynynda 9 maýsymda Soltústik Makedonııamen sheberlik baıqasady.
Ótken týrda jaraqat alǵanyna baılanysty Serikjan Mýjıkov aldaǵy oıyndarǵa qatysa almaıdy. Onyń ornyna ulttyq qurama sapyna «Elimaıdyń» jartylaı qorǵaýshysy Almas Tólibaı qosyldy.
Aıta ketsek, budan buryn osyndaı sebepterge baılanysty «Aqtóbe» qorǵaýshysy Álibek Qasym, túrkııalyq «Beshıktash» klýbynyń jartylaı qorǵaýshysy Baktıer Zaınýtdınov ulttyq quramaǵa kómektese almaıtyny belgili boldy.