Dastan Sátpaev «Bernlı» sapyndaǵy alǵashqy tolyq matchyn ótkizdi
ASTANA. KAZINFORM – Qazaqstandyq shabýylshy Dastan Sátpaev aǵylshyndyq «Bernlı» klýbynyń sapynda alǵash ret tolyq match ótkizip, komandadaǵy eń joǵary baǵany aldy, dep habarlaıdy Sports.kz.
18 jastaǵy qazaqstandyq fýtbolshy Chempıonshıptiń úshinshi týrynda «Norvıchke» qarsy matchta negizgi quramda alańǵa shyǵyp, 90 mınýt tolyq oınady. Kezdesý 1:4 esebimen «Bernlıdiń» jeńilisimen aıaqtaldy.
Flashscore Sátpaevtyń oıynyna 7,5 ball berdi. Bul – «Bernlı» fýtbolshylary arasyndaǵy eń joǵary kórsetkish.
Match barysynda Dastan qarsylas qaqpasyna úsh ret soqqy jasap, onyń bireýin qaqpaǵa dál baǵyttady. Onyń kútiletin gol kórsetkishi (xG) 0,15 boldy. Sondaı-aq qarsylas aıyp alańynda dopqa segiz ret tıip, segiz drıblıng áreketiniń tórteýin sátti oryndady jáne ózine qarsy bir ereje buzýǵa sebep boldy.
– Sátpaev úsh sheshýshi pas berdi, onyń kútiletin assıst kórsetkishi (xA) 0,39 boldy. Sondaı-aq ol alańnyń sońǵy úshten bir bóligine baǵyttalǵan 14 pastyń segizin dál jetkizip, bir qaýipti sát uıymdastyrdy, – dep jazady basylym.
Jalpy qazaqstandyq shabýylshy 30 pastyń 23-in dál jetkizdi. Pas dáldigi 77%-dy qurady.
Qorǵanysta da Sátpaev belsendilik tanytty. Ol 11 jekpe-jektiń tórteýinde jeńiske jetip, eki ret dopty qaǵyp aldy jáne úsh márte dopty óz komandasynyń baqylaýyna qaıtardy.
«Bernlı» Chempıonshıptegi kelesi kezdesýin 3 qyrkúıekten 4 qyrkúıekke qaraǵan túni óz alańynda «Mıdlsbroǵa» qarsy ótkizedi.
Aıta keteıik, Dastan Sátpaev «Bernlı» sapyndaǵy alǵashqy oıynyn ótkizdi.
