Dastan Sátpaev «Bernlı» sapyndaǵy alǵashqy oıynyn ótkizdi
ASTANA. KAZINFORM — Qazaqstandyq shabýylshy Dastan Sátpaev Anglııa chempıonshıpinde oınaıtyn «Bernlı» komandasy sapynda alǵashqy oıynyn ótkizdi.
«Bernlı» ekinshi týrda syrt alańda «Vest Brombıch Albıon» klýbymen jasyl alańǵa shyqty.
Kezdesý barysynda qazaqstandyq fýtbolshy qosalqy quramnan bastady. Oıynnyń 57-mınýtynda «Bernlıdiń» bas bapkeri Gregýar Kýder oǵan senim bildirip, otandasymyz jasyl alańǵa shyǵýǵa múmkindik aldy. Osylaısha, Qazaqstan tarıhynda Anglııa chempıonatynda oıyn kórsetken qazaqstandyq tuńǵysh fýtbolshy atandy.
Kezdesý barysynda Dastan Sátpaev gol soǵa alǵan joq. Sondaı-aq nátıjeli pasymen de erekshelene almady. Soǵan qaramastan birneshe sátte qarsylas komanda oıynshylaryn aldap ótip, «Vest Bormbıch Albıon» qaqpasyna qaýipti shabýyl uıymdastyrdy.
Aıta ketsek, qazaqstandyq shabýylshy «Bernlı» komandasy quramyna jaqynda qosyldy. Oǵan deıin Anglııanyń «Chelsı» klýby fýtbolshymen kelisimshartqa qol qoıyp, bernlılik komandaǵa jalǵa berýge sheshim qabyldady.
Alǵashqy eki týrdan keıin «Bernlı» 1 upaı jınap, týrnır kestesinde 18-orynda keledi. Olar birinshiliktegi alǵashqy kezdesýinde «Vest Hem ıÝnaıted» klýbymen 1:1 esebine qanaǵat bildirgen edi. Bul matchqa Dastan Sátpaev qatysa alǵan joq.
Endi olar aldaǵy oıynyn 29 tamyzda syrt alańda «Norvıch sıtı» komandasyna qarsy ótkizedi.
Dastan Sátpaev 2008 jyly 12 tamyzda Almatyda dúnıege kelgen. 2024-2026 jyldary almatylyq «Qaırat» sapynda 41 kezdesýde 21 gol soǵyp úlgerdi.
Al Qazaqstan ulttyq quramasy sapynda 2025 jyldan beri jeti kezdesýde bir márte mergendik tanytty.
