Dastan Sátbaev «Chelsıdiń» kózine qalaı túskenin aıtty

ALMATY. KAZINFORM — Búgin almatylyq «Qaırat» klýby akademııa tárbıelenýshisi Dastan Sátpaev «Chelsıge» aýysqanyn resmı túrde jarııalady.

Klýbtyń áleýmettik jelidegi paraqshasynda Dastan Sátpaev pen «Qaırat» FK baqylaý keńesiniń tóraǵasy Qaırat Boranbaev tikeleı efırge shyǵyp, aıtylǵan transferdiń qalaı júzege asqanyn baıandady.

Klýb tóraǵasynyń aıtýynsha, Shveıtsarııada U-17 oıynshylary arasynda ótken týrnırde «Qaırat» tálimgerleri jeńiske jetkennen keıin kóptegen eýropalyq klýb Dastan Sátpaevqa qyzyǵýshylyq tanytqan.

— Bizge «RB Leıptsıg» pen portýgalııalyq «Benfıkadan» usynys boldy. Biraq olar sóz júzinde boldy. Al «Chelsımen» kelissóz júrgizgen kezde olar bizge resmı hat joldady. Hat alǵannan keıin Dastannyń ákesine habarlasyp, «Chelsıden» resmı usynys bar ekenin aıttym. Bul kelissózderde qarjylyq máselelerdi sheshý emes, qundylyqtardy anyqtaý mańyzdy boldy. «Chelsıdiń» Dastan Sátpaevqa erekshe yqylas tanytqany mańyzdy boldy. Qalǵanyn zańgerler men klýb qyzmetkerleri sheshti. Nátıjesinde eki jaq ta, sonyń ishinde Dastan da ózine qolaıly kelisimshartqa otyrdy, — dedi ol.

Sonymen qatar, Qaırat Boranbaev jas fýtbolshy 18 jasta «Chelsıge» attanǵanǵa deıin aǵylshyn klýby jibergen jeke bapkerdiń nazarynda bolatynyn atap ótti. Onyń aıtýynsha, sheteldik maman aldaǵy 1,5 jyl Qazaqstanda turyp, Sátpaevtyń damýyna kómektesetin bolady. Sondaı-aq, ol el birinshiliginiń oıyndaryna tek jeke bapkeriniń kelisimimen ǵana qatysa alady.

Dastan Sátpaev efır barysynda Anglııadaǵy qaralym qalaı bolǵanyn da aıtyp berdi.

— Men Londonda qaralymda 2 apta boldym. Ol jaqta meni jyly qarsy aldy. Bastapqy kezde tildesip, sóılesý qıyn boldy. Óıtkeni olar aǵylshyn tilinde ártúrli aktsentpen sóıledi. Biraq ýaqyt óte úırenip, ózimdi kórsete aldym, — dedi ol.

Sóz aıaǵynda Sátpaev súıikti oıynshysy — Lıonel Messı, al qazir boı túzeıtin oıynshylary — Kılıan Mbappe men Lamın ıAmal ekenin atap ótti.

Eske salaıyq, buǵan deıin tanymal ınsaıder qazaq oıynshysynyń «Chelsıǵa» aýysqanyn habarlady.

Búgin «Qaırat» akademııa túleginiń aǵylshyn klýbyna aýysqanyn rastady.

Sondaı-aq álemdik fýtbolyń ańyzy Sol Kempbell «Chelsıdiń» qazaqstandyq Dastan Sátbaevty, al «Manchester Sıtı» klýby ózbekstandyq Abdýqodır Hýsanovty satyp alýyna baılanysty pikir bildirdi.