Dastan Sátbaev álemdik fýtboldaǵy eń úzdik jas talanttar qataryna qosyldy

ASTANA.KAZINFORM - Brıtandyq The Guardian gazeti álemdik fýtboldaǵy eń úzdik 60 jas talantty atady. 2008 jyly dúnıege kelgen keleshegi zor oıynshylar tiziminde almatylyq «Qaırattyń» shabýylshysy Dastan Sátbaev ta bar, dep habarlaıdy Kazinform tilshisi.

— Sátbaev — bıylǵy maýsymdaǵy Chempıondar lıgasynyń toptyq kezeńine shyqqan qazaqstandyq «Qaırattyń» eń jaryq juldyzy. Ol 2024 jyldyń mamyr aıynda, ıaǵnı 16 jasqa tolýyna úsh aı qalǵanda, Qazaqstannyń joǵarǵy dıvızıonynda debıýt jasaǵannan beri úlken úmit kúttirdi jáne ol eń sheshýshi sátterinde ony aqtap shyqty, — dep jazady brıtandyq basylym.

Basylym Sátbaevtyń birinshi irikteý kezeńinde Slovenııanyń «Olımpııa» (Lıýblıana) qaqpasyna gol soqqanyn, sosyn Fınlıandııanyń KýPS klýbymen oınaǵanda erekshelengenin, al Slovakııanyń «Slovan» komandasymen (Bratıslava) ótken oıynnyń sońǵy mınýtynda «Qaırat» 1:0 esebimen jeńiske jetken kezde sheshýshi penaltıdi oryndaǵanyn eske alady.

— «Chelsı» qańtar aıynda Sátbaevpen 4 mıllıon eýroǵa kelisim jasasqanyna qýanatyn shyǵar, óıtkeni onyń quny bolashaqta aıtarlyqtaı ósedi degen boljam bar. Ol jyldamdyq pen tehnıkany óz jasynan áldeqaıda joǵary oıyn sheberligimen úılestiredi jáne 2026 jyldyń tamyzynda Stemford Brıdj klýbyna qosylǵanda aǵylshyn Premer-lıgasynda ózin taǵy kórsetýge úmitti, — dep jazady The Guardians.

Esterińizge sala keteıik, buǵan deıin Dastan Sátbaev «Chelsıdiń» kózine qalaı túskenin aıtyp bergen edi.