Ulytaý ákimi óńirdegi kadrlyq taǵaıyndaýlar jóninde pikir bildirdi

JEZQAZǴAN. KAZINFORM — Ulytaý oblysynyń ákimi Dastan Ryspekov óńirdegi kadr máselesiniń qalaı sheshilip jatqany jóninde tilshiler suraǵyna jaýap berdi. Jýrnalıster keıbir ákimderdiń jańa laýazymǵa óz komandasymen keletinin aıtyp, ákimnen kadrlyq suraqtar qalaı sheshiletinin surady.

— Men qyzmetke kelgende bes basqarmada basshy bolmaǵan. Eki basqarmada qylmystyq isterge baılanysty taǵaıyndaý júrgize almadyq, al úsheýine jańa basshylar taǵaıyndaldy. Buǵan deıin Almaty men Pavlodar oblystarynda jumys istep, bilikti mamandarmen tanysqanmyn. Ózim taǵaıyndalǵannan keıin olardy bizge kelýge shaqyrdym. Burynǵy oryndarynda olar tómengi laýazymdarda bolsa, bizde basqarma basshysy qyzmetine kóterildi, — dep jaýap berdi ákim Ortalyq kommýnıkatsııalar qyzmetinde. 

Ol oblysta konkýrs jarııalanǵannyń ózinde úmitkerlerdiń az bolatynyn, al keıbir konkýrstardy birneshe ret ótkizýge týra keletinin jasyrmady.

— Úsh basqarma basshysy barlyq konkýrstyq rásimderden ótip, zań aıasynda jumysqa qabyldandy. Men qyzmetke kelgennen beri eshbir saıası qyzmetkerdi aýystyrǵan joqpyn, — deıdi D. Ryspekov.

Ákim komandamen jumys isteýde esh jamandyq joq ekenin, óıtkeni «komanda — banda emes, óńirdiń damýy úshin birge jumys isteýge daıyn ortaq maqsaty bar adamdar» ekenin aıtty.

Aıta keteıik, Ulytaý oblysynyń bıýdjeti 30 mlrd teńgege artty. 

Buǵan deıin D. Ryspekov Jezqazǵanda eski fabrıka ǵımaraty kásipkerlerge beriletinin aıtqan edi.

2026 jyly Jezqazǵannan Balqash pen Túrkistan qalalaryna jańa áýe reısteri ashylady.