Dastan Ryspekov Ulytaý oblysynyń ákimi qyzmetinen bosatyldy
ASTANA. KAZINFORM – Dastan Ryspekov Ulytaý oblysynyń ákimi laýazymynan bosatyldy, dep habarlaıdy Aqordanyń baspasóz qyzmeti.
– Memleket basshysynyń Jarlyǵymen Dastan Adaıuly Ryspekov Ulytaý oblysynyń ákimi laýazymynan bosatyldy, – delingen habarlamada.
Dastan Adaıuly memlekettik qyzmette jáne ulttyq kompanııalarda túrli basshylyq laýazymdardy atqarǵan.
Dastan Ryspekov 2005 jyly ál-Farabı atyndaǵy Qazaq ulttyq ýnıversıtetin «memlekettik jáne jergilikti basqarý» mamandyǵy boıynsha támamdaǵan. 2008 jyly QazMZÝ Almaty zań akademııasynda «quqyqtaný» mamandyǵyn meńgerdi. 2022 jyly Qazaqstan Respýblıkasy Prezıdentiniń janyndaǵy Memlekettik basqarý akademııasynda memlekettik basqarý magıstri dárejesin aldy.
Eńbek jolyn 2006 jyly Almaty qalasy Ekonomıka jáne bıýdjettik josparlaý departamentiniń túsimderdi boljaý bóliminiń bas mamany bolyp bastady.
2007-2011 jyldary atalǵan departamenttiń ekonomıkalyq saıasat jáne salalyq josparlaý bólimin basqardy.
2011-2012 jyldary Almaty qalasy boıynsha Tekserý komıssııasynyń josparlaý, eseptilik jáne aqparattandyrý bóliminiń bastyǵy qyzmetin atqardy.
2013-2015 jyldary Almaty qalasy Ekonomıka jáne bıýdjettik josparlaý basqarmasy basshysynyń orynbasary boldy.
2015-2016 jyldary Respýblıkalyq bıýdjettiń atqarylýyn baqylaý jónindegi Esep komıtetinde josparlaý jáne monıtorıng júrgizý sektorynyń meńgerýshisi qyzmetin atqardy.
2016-2018 jyldary «Astana EKSPO – 2017» ulttyq kompanııasy» AQ-nyń býhgalterlik esep jáne eseptilik departamentiniń dırektory – bas býhgalteri boldy.
2018-2019 jyldary Pavlodar oblysynyń kásipkerlik, saýda jáne týrızm basqarmasyn basqardy.
2019-2020 jyldary «Astana EKSPO – 2017» ulttyq kompanııasy» AQ ekonomıka jáne bıýdjettik josparlaý departamentiniń dırektory qyzmetine qaıta oraldy.
2020-2023 jyldary Qazaqstan Respýblıkasy Mádenıet jáne sport mınıstrligi Týrızm ındýstrııasy komıtetiniń tóraǵasy boldy.
2023-2024 jyldary Ulytaý oblysy ákiminiń orynbasary qyzmetin atqardy.
2024 jyldyń naýryz-qazan aılary aralyǵynda Qazaqstan Respýblıkasy Prezıdenti Ákimshiliginiń memlekettik ınspektory boldy.
2024 jylǵy 9 qazanda Memleket basshysynyń Jarlyǵymen Ulytaý oblysynyń ákimi bolyp taǵaıyndaldy.
Aıta keteıik, buǵan deıin Serik Shápkenov Atyraý oblysynyń ákimi qyzmetinen bosatyldy.
