Daryndy balalar mektebine oqýshylar irikteýdi ózgertý kerek - vıtse-mınıstr
QASKELEŃ. QazAqparat - QR Bilim jáne ǵylym vıtse-mınıstri Ashat Aımaǵambetov daryndy balalarǵa arnalǵan mektep dırektorlary men pedagogtarymen kezdesý barysynda daryndy balalardy irikteý erejesin ózgertý kerektigin aıtty, dep habarlaıdy QazAqparat tilshisi.
Qazaqstanda búginde daryndy balalarǵa arnalǵan 131 mektep bar eken.
«Men osy mektepterde bala qabyldaý erejesin ózgertýdi usyndym. Mınıstr qabyl aldy. Biz merıtokratııalyq qaǵıdany qalyptastyrýdy usynamyn. Bul mektepterge irikteý týra Nazarbaev zııatkerlik mektepterindegideı bolýy tıis. Balalardy iriktegen kezde oǵan eshkimniń yqpaly bolmaýy kerek. Tıptik erejelerge ózgeris engizý kerek. Jumys tobyn quryńyzdar, usynys kútemiz», - dedi
Ashat Aımaǵambetov.
Vıtse-mınıstr oqýshylarǵa arnalǵan olımpıadalar men konkýrstardyń ortaq kúntizbesin jasaýdy usyndy.
«Bul baıqaýlardyń barlyǵy kúntizbede tirkelýi tıis. Aqyly baıqaýlar týraly aqparat ta ashyq bolýy kerek. Ár ata-ana, ár bala baıqaý týraly tolyq aqparatpen qamtylýy tıis», - dedi ol.
Mınıstr ınternet-olımpıadalardyń da nátıjesi obektıvti emestigin aıtty.
«Internet-olımpıada suraqtaryna bala ózi jaýap berip otyrǵanyna kóz jetkizý qıyn. Uıymdastyrýshylar mektepke kelip, ata-analardy, ustazdardy aqyly olımpıadaǵa qatysýǵa úgitteıdi. Kelisken ata-analar keıin birdeńe durys bolmasa, bizge aryzdanady. Tek qana mınıstrlikte attestattaýdan ótken baıqaýlarǵa ǵana qatysýǵa bolady. Al aıdaladaǵy Tıýmende bir bólmeli páterde ótkiziletin olımpıadanyń sertıfıkattary qabyldanbaıdy»,- dedi Ashat Aımaǵambetov.
