«Daryn» memlekettik jastar syılyǵy bıyldan bastap jyl saıyn beriletin boldy
Aıta ketsek, elimizde «Jańǵyrý joly» respýblıkalyq jastar qozǵalysy qurylǵan bolatyn. Tyń qozǵalystyń tóraǵasy bolyp Maksım Spotkaı saılandy. Maksım Spotkaıdyń aıtýynsha, qozǵalystyń mıssııasy - dinine, tiline, ultyna qaramastan, Qazaqstannyń barlyq jastaryn elimizdiń keshendi jańǵyrýyna atsalystyrý bolyp tabylady.
Tyń qozǵalystyń búgingi quryltaıynda QR Din isteri jáne azamattyq qoǵam mınıstri Nurlan Ermekbaev jastarǵa sáttilik tiledi.
«Men óz sózimdi qazaqtyń birtýar batyry Baýyrjan Momyshulynyń qanatty sózimen bastaǵym keledi. Batyrymyz «20 jas - tarıhı erlikter jasaıtyn jas. Soǵan árdaıym ázir bolý kerek» degen eken. Ult bolyp uıysyp, el bolyp eńsemizdi kótergen kezeńde qolǵa alar isimizdiń biri - jas urpaqty tárbıeleý boldy. Halqymyzdyń bolashaǵy - búgingi urpaq. Qaı ǵasyrda bolsyn ult ómirin órkendetýshi sanaly da salaýatty, rýhy bıik urpaqty tárbıeleý - qoǵam aldyndaǵy eń basty mindetterdiń biri», - dedi mınıstr.
Nurlan Ermekbaev Elbasy atap ótkendeı, 140 etnostyń basyn quraıtyn barlyq qazaqstandyqtardyń birligi - bul ǵalamat qundylyq, sondyqtan etnoasaralyq kelisimdi saqtaýdyń mańyzy zor ekenin atap ótti. Sonymen qatar, Elbasynyń «Bolashaqqa baǵdar - Rýhanı jańǵyrý» baǵdarlamalyq maqalasynda bilimdi, kózi ashyq, kókiregi oıaý bolýǵa umtylý - bizdiń qanymyzda bar qasıet dep aıtqanyn jastardyń esine saldy.
«Búgin biz barlyǵyn jalpy aqparattandyrý jáne belsendi jahandyq birigý protsesteri zamanynda rýhanı adamgershilik pen tehnologııa, tehnokratııa arasyndaǵy joldy eńserý aldynda turmyz. «Rýhanı jańǵyrý» baǵdarlamasy aıasynda Din isteri jáne azamattyq qoǵam mınıstrligi «Atameken» jobasyn júzege asyryp jatyr. Ol eki «Áleýmettik bastamalar kartasy» men «Jomart júrek» atty jobalardan turady. «Áleýmettik bastamalar kartasy» azamattardyń belsendiligin arttyrýǵa, «Jomart júrek» demeýshilik etken azamattardy qoldaýǵa arnalǵan», - dedi ol.
Mınıstr sonymen birge, ótken jyly ulttyq qundylyqtardy nasıhattaýǵa arnalǵan «Abaı joly ulttyq mektebi» degen jobany bastap, ol qazirgi ýaqytta kóptegen JOO-larda jumys istep jatqanyn aıtty.
«300 mektep pen JOO, kolledjder men mektepterde «Túlekter taqtasy» atty ınteraktıvti taqtalar ornatyldy. «Daryn» memlekettik syılyǵy bıyldan bastap eki jylda bir ret emes, jyl saıyn beriletin bolady. Qazirgi ýaqytta Úkimet osynaý syılyqtyń ıegeri atanǵan jastarǵa beriletin syıaqynyń mólsherin arttyrýdy qarastyrýda», - dedi Ermekbaev.
