«Daryn» memlekettik syılyǵynyń mólsheri 3 esege artty
Komıssııa jumysyna QR Parlamenti Májilisiniń depýtattary, mádenıet jáne óner qaıratkerleri, memlekettik organdar, buqaralyq aqparat quraldary, azamattyq sektor ókilderi qatysty.
Otyrysty ashqan QR Qoǵamdyq damý mınıstri Darhan Káletaev 2018 jyly «Daryn» Memlekettik jastar syılyǵynyń mólsheri 3 esege artyp, ár nomınatsııa boıynsha 600 myń teńge úlestiriletin jetkizdi.
Usynylǵan úmitkerlerdi qarastyrǵan komıssııa músheleri 2018 jylǵy «Daryn» Memlekettik jastar syılyǵynyń laýreattaryn anyqtady. Syılyqaqyny berý týraly sheshim ony Qazaqstan Respýblıkasynyń Úkimeti qabyldaǵan sátten bastap kúshine enedi jáne jeńimpazdar aǵymdaǵy jyldyń jeltoqsan aıynda ótetin saltanatty rásim barysynda marapattalatyn bolady.
Bıylǵy jyly aıtýly marapatqa ótinim bildirgenderdiń sany rekordtyq mejege jetti, naqtyraq aıtqanda 301 ótinish kelip túsken. Onyń ishinde 271 ótinim qabyldanyp, qaraldy.
Nomınatsııalar boıynsha kelip túsken ótinishter sany kelesideı: «Teatr jáne kıno» - 41, «Jýrnalıstıka» - 15, «Ádebıet» - 18, «Sport» - 37, «Estrada» - 21, «Klassıkalyq mýzyka» - 17, «Halyq shyǵarmashylyǵy» - 20, «Dızaın jáne beıneleý óneri» - 17, «Ǵylym» - 48, «Qoǵamdyq qyzmet» - 37 ótinish. 2016 jyly-126, 2017 jyly- 213 ótinim kelip túsken.
Qazaqstan Respýblıkasy Parlamentiniń depýtaty, Olımpıada chempıony, Daryn syılyǵy boıynsha komıssııanyń «Sport» sektsııasynyń jetekshisi Serik Sápıevtiń paıymdaýynsha, atalǵan syılyq Qazaqstan jastaryn qoǵam men memlekettiń ıgiligi jolynda jańa jeńister men jetistikterge jigerlendiredi.
«Men ózim «Daryn» syılyǵynyń laýreaty boldym. Atalǵan syılyqty alǵandar úshin ǵana emes, sonymen qatar syılyqqa usynylǵandarǵa da úlken shabyt beredi. Jastar ózderiniń qatarlastarynyń jetistikterge jetip, syılyqqa ıe bolyp jatqandaryn kórip, olarda belgili bir nátıjege jetý jolynda kúsh-jigerlerin salatyn bolady», - dedi Serik Sapıev.
BUU Jas kóshbasshylar qaýymdastyǵynyń múshesi, «CentrAsia Group» holdınginiń bas dırektory, komıssııa múshesi Oljas Súleımenovtiń aıtýynsha, «Daryn» syılyǵynyń deńgeıi jyl saıyn artyp keledi.
«Búgingi komıssııa jumysyn óte qarqyndy, ashyq pikirtalas túrinde ótti dep aıtýǵa bolady. Barlyq úmitkerler laıyqty. Bizdiń elimizde ártúrli salalarda jáne árqaısysy óz salalary boıynsha tabysty bolǵan kóptegen jastar bar ekendigin maqtan tutamyn. Komıssııanyń múshesi bolý úlken qurmet. Meniń oıymsha, «Daryn» memlekettik syılyǵynyń deńgeıi jyl saıyn artyp keledi», - dedi O.Súleımenov.
Esterińizge sala keteıik, «Daryn» Memlekettik jastar syılyǵy jyl saıyn jastardyń ǵylym, shyǵarmashylyq, qoǵamdyq qyzmet, sondaı-aq joǵary sporttyq jetistikterine qoldaý kórsetý maqsatynda tabystalady. «Daryn» syılyǵynyń jeńimpazdaryna Qazaqstan Respýblıkasy Úkimetiniń qaýlysymen Daryn memlekettik jastar syılyǵynyń laýreaty» ataǵy beriledi jáne olar dıplommen, tósbelgilermen jáne aqshalaı syılyqtarmen marapattalady.