Darxan Káletaev qoǵamdyq uıymdardy qaıta tirkeýden ótkizýdi usyndy
Mınıstrdiń aıtýynsha, sońǵy on jyldyń ishinde úkimettik emes uıymdardyń sany úsh esege artyp, 20 myńǵa deıin jetti. Osy ýaqyttyń ishinde áleýmettik sala boıynsha memlekettik tapsyrystyń kólemi de 13 esege ósti. Bıyl memlekettik tapsyrys 19 mlrd teńgeden asyp otyr.
«Menińshe, bul - óte kóp qarjy. Endi qarańyz, respýblıkada 20 myń úkimettik emes uıym tirkeldi dedik qoı, biraq naqty qansha uıym jumys istep jatyr? Mınıstrliktiń aqparatyna sáıkes, granttardy alý úshin tek 4,5 uıym ǵana tirkeýden ótti. Ádilet mınıstrligi men Qarjy mınıstrligi usynǵan málimet boıynsha 10 myńnan astamy qarjylaı esep berip otyrady. Endigi másele, qoǵamdyq uıymdardy qaıta tirkeýden ótkizý kerek pe? Ondaı shara qoǵamdy dúrliktirýi múmkin. Degenmen, atalǵan shara qajet dep oılaımyn. Búgingi alańdy paıdalany otyryp, osy máseleni úkimettik emes uıymdarlyń talqylaýyna shyǵarǵym kelip otyr. Osy máseleni qalaı sheshemiz? Qoǵamdyq uıym ókilderi ózderi aıtsyn», - deıdi D.Káletaev búgin «Nur Otan» partııasy janyndaǵy úkimettik emes uıymdarmen ózara is-qımyl jónindegi keńeste.
Aıta keteıik, keńes otyrysy kezinde «Nur Otan» partııasy Tóraǵasynyń birinshi orynbasary Máýlen Áshimbaev partııanyń negizgi mindetine toqtaldy.
«Memleket basshysynyń tapsyrmasy boıynsha biz partııany jańartý jumysyn bastadyq. Negizgi maqsat - «Nur Otandy» zaman talabyna saı kreatıvti partııaǵa aınaldyrý. Ondaı partııa xalyq úshin, xalyq arasynda jumys istep, eldiń qoldaýyna ıe bolýy shart. Osy oraıda biz partııa jumysyndaǵy bıýrokratııany joıyp, barynsha ashyq bolýdy qalaımyz. Partııa basshylyǵynyń esigi qarapaıym qyzmetkerlerge de, xalyqqa da árdaıym ashyq bolýy qajet», - dedi M.Áshimbaev.
