Dármen Sádýaqasov shahmatshy Bıbisaranyń tabıǵı qabileti týraly aıtty
ASTANA. QazAqparat - Tanymal shahmatshy Dármen Sádýaqasov Reseıden qaıtyp kelgen Bıbisara Asaýbaevanyń bala kezinde arnaıy testen ótkizgen, dep habarlaıdy QazAqparat tilshisi.
«Men ózim Bıbisaranyń talantyna tántimin. Áli esimde, 6 jasynda bolǵanda men ony testen ótkizdim. Sol kezde onyń qabiletin kórip, anasyna birden aıttym. Onyń boıynda sırek kezdesetin talant, myqty tabıǵı qabilet bar. Ol bir nársege zeıin qoıyp, uzaq otyra alady. Ony «zeıin kontsentratsııasy» deıdi. Dál osy kontsentratsııany Bıbisara uzaq ýaqyt ustap otyra alady. Negizi, ár adamnyń zeıin qoıý qabileti ártúrli. Al Bıbisara test kezinde óte jaqsy nátıje kórsetti. Shahmatshy úshin bul asa qajetti qabilet, asa úlken artyqshylyq», - dedi D.Sádýaqasov jýrnalısterge bergen suhbatynda.
Onyń aıtýynsha, jeke qabileti arqasynda Bıbisara Asaýbaev san alýan jastaǵy shahmatshylar arasynda oq boıy ozyq shyǵyp, chempıon atandy.
«Men ol kezde federatsııanyń vıtse-prezıdenti qyzmetin atqardym. Balalar shahmatyna jaýap berdim. Biz Bıbisaraǵa únemi kómektesip turdyq, jaqsy stıpendııa berildi. Jattyǵýlar men jarystardyń aqshasy da tólendi. Bylaısha aıtqanda, Bıbisaranyń ósýi úshin barlyq jaǵdaı jasaldy. Men onyń Qazaqstan federatsııasynyń quramyna qaıtyp kelgenine qýanyshtymyn. Qazir ol 15 jasta. Demek, úlken jeńisterdiń bári alda», - dep atap aıtty D.Sádýaqasov. 
Aıta keteıik, osydan úsh jyl buryn Bıbisara Asaýbaeva Reseıge kóship, Máskeý oblysynyń atynan óner kórsetti. Bir jyldan keıin bapker Evgenıı Solojenkın oǵan elektrondy keńesterdi paıdalanady dep jala japty. Alaıda sotta Bıbisara Asaýbaeva ózin tolyǵymen aqtap shyqty. Reseıde turǵanda tanymal Garrı Kasparov ony AQSh-tyń shahmat klýby atynan óner kórsetýge shaqyrdy. Biraq Bıbisara ol usynystan bas tartyp, Qazaqstanǵa qaıtyp keldi. Shahmatshy qyz Mańǵystaý oblysynyń atynan jarystarǵaqatysatyn boldy .
