«Dármek» operatsııasy barysynda 22 myńnan astam dárilik preparat aınalymnan alyndy
ASTANA. KAZINFORM – ІІM «Zań men tártip» qaǵıdatyn iske asyrý boıynsha jumysty jalǵastyryp jatyr.
Esirtki, prekýrsorlar, psıhotroptyq jáne kúshti áser etetin zattardyń zańdy aınalymyn baqylaý maqsatynda 15-19 maýsym aralyǵynda el aýmaǵynda «Dármek» jedel-profılaktıkalyq is-sharasynyń kezekti kezeńi ótkizildi.
Tekserý barysynda esirtki jáne prekýrsorlardyń zańdy aınalymymen aınalysatyn 1 myńnan astam zańdy tulǵa qamtyldy, onyń ishinde 876 dárihana, 278 aýrýhana men emhana, sondaı-aq 203 ónerkásiptik kásiporyn bar. Operatsııa barysynda 31 qylmystyq is qozǵaldy, onyń 21-i kúshti áser etetin zattardyń zańsyz aınalymy faktisi boıynsha jáne 10-y jeke dárihanalardyń farmatsevtterine qatysty dárilik preparattardy retseptsiz satý faktisi boıynsha.
Ónerkásip salasynda 4,6 myń tonna ártúrli prekýrsorlardyń aınalymy shektelip, 86 ákimshilik quqyq buzýshylyq anyqtaldy. Medıtsına salasynda quramynda esirtkisi bar 22 myń dárilik preparattardyń aınalymy shektelip, 120 ákimshilik quqyq buzý anyqtaldy.
Máselen, Astana qalasynda quramynda esirtkisi bar preparattardyń zańsyz aınalymy úshin fıtnes klýbtarda jattyqtyrýshy bolyp jumys isteıtin 2 astana turǵyny ustaldy.
Óskemen qalasynda Wildberries marketpleısimen ózara is-qımyl jasaý barysynda elge tyıym salynǵan sıbýtramın zaty bar salmaq túsiretin bıologııalyq belsendi qospany jetkizý arnasy toqtatyldy. Almaty qalasynda kúshti áser etetin dárilik zattardy retseptsiz satqany úshin jeke dárihanalardyń farmatsevtteri ustalyp, 3,3 myńnan astam osyndaı dáriler tárkilenip, qylmystyq ister qozǵaldy.
— Qurmetti qazaqstandyqtar jáne elimizdiń qonaqtary! Aıtylǵan faktilerge baılanysty, sizderge usynylatyn preparattar men quraldarǵa erekshe muqııat bolýǵa shaqyramyz. Sonymen qatar esirtki jáne prekýrsorlardyń zańdy aınalymymen aınalysatyn zańdy tulǵalarǵa baqylaýdaǵy zattardy tasymaldaý, saqtaý, paıdalaný jáne satý normalaryn qatań saqtaý qajettigin eskertemiz. Eske salamyz, osy jyldyń 1 qańtarynan bastap kúshti áser etetin zattardy zańsyz satyp alý, saqtaý jáne tasymaldaý úshin QR QK-niń 301-babyna sáıkes qylmystyq jaýapkershilik engizildi, sanktsııa boıynsha 15 jylǵa deıin bas bostandyǵynan aıyrý kózdelgen, — dep atap ótildi ІІM-de.
Aıta ketelik Sıntetıkalyq esirtki satý: transulttyq qylmystyq topty basqarǵan kúdikti Polshadan ekstradıtsııalanǵan edi.
