Dárilik zattardy utymdy basqarýdyń esebinen 3,5 mlrd teńge únemdeldi - DSM
ASTANA. KAZINFORM – 2024–2025 jyldardyń qorytyndysy boıynsha statsıonarlarda dárilik zattardy basqarýdyń zamanaýı tásilderin engizýden alynǵan ekonomıkalyq tıimdilik shamamen 3,5 mlrd teńgeni qurady.
Bul týraly QR Densaýlyq saqtaý mınıstrliginde eldegi statsıonarlarda klınıkalyq farmakologııa jáne gospıtaldyq farmatsııa bólimshelerin ashý nátıjeleri, sondaı-aq medıtsınalyq uıymdarda osy qyzmetti odan ári damytý sharalaryna arnalǵan jıynnan málim boldy, dep habarlaıdy QR Densaýlyq saqtaý mınıstrliginiń baspasóz qyzmeti.
Baspasóz qyzmetiniń málimetterine qaraǵanda, búginde klınıkalyq farmakologııa jáne gospıtaldyq farmatsııa qyzmetiniń jumysy dárilik preparattardy taǵaıyndaýdy, esepke alýdy jáne qoldanýdy baqylaýǵa, dárilik qatelikterdiń aldyn alýǵa, jaǵymsyz reaktsııalar qaýipterin tómendetýge jáne bıýdjet qarajatyn utymdy paıdalanýǵa baǵyttalǵan.
Bul qyzmettiń jumysy bir patsıentke kóptegen dárilik zattardy negizsiz taǵaıyndaý tájirıbesi bolyp tabylatyn polıpragmazııamen kúresýde erekshe mańyzǵa ıe. Mundaı jaǵdaı asqynýlar qaýpin arttyryp, emdeý nátıjelerine keri áser etedi.
Qazirgi ýaqytta Qazaqstanda klınıkalyq farmakologııa jáne gospıtaldyq farmatsııanyń 142 bólimshesi jumys isteıdi. Olardy engizý jumystary eń belsendi túrde Astana, Shymkent qalalarynda, sondaı-aq Atyraý, Qyzylorda jáne Almaty oblystarynda júrgizilip jatyr.
Qyzmettiń negizgi baǵyttarynyń biri – bakterııaǵa qarsy preparattardy utymdy qoldanýdy qamtamasyz etý. Mamandardyń baǵalaýynsha, antıbıotıktermen emdeýdiń 30-50 paıyzy dárilik zattardy negizsiz taǵaıyndaýmen baılanysty bolýy múmkin. Bul densaýlyq saqtaý júıesiniń shyǵystaryn arttyryp qana qoımaı, mıkroorganızmderdiń antıbıotıkterge tózimdiliginiń damýyna yqpal etedi. Bul qubylys qoǵamdyq densaýlyq saqtaý salasyndaǵy jahandyq qaterlerdiń biri retinde tanylǵan.
Qazaqstan Respýblıkasynyń Densaýlyq saqtaý mınıstri Aqmaral Álnazarova klınıkalyq farmakologııa qyzmetin damytý bıýdjet qarajatyn tıimdi jumsaý máselesi ǵana emes, eń aldymen patsıentterdiń qaýipsizdigi máselesi ekenin atap ótti.
-Áńgime tek bıýdjet qarajatyn únemdeý týraly ǵana emes, sonymen qatar dárilik qatelikterdiń aldyn alý, asqynýlar sanyn azaıtý jáne emdeý sapasyn arttyrý týraly bolyp otyr. Tıimdiligi dáleldengenine qaramastan, sońǵy úsh jylda statsıonarlyq kómek kórsetetin medıtsınalyq uıymdardyń nebári 34,1 paıyzynda ǵana tıisti bólimsheler quryldy, – dedi mınıstr.
Jańa modeldiń praktıkalyq tıimdiligi naqty medıtsınalyq uıymdardyń nátıjelerimen de dáleldenip otyr.
Máselen, Astana qalasynyń №1 kópbeıindi qalalyq aýrýhanasynda gospıtaldyq farmatsııa bólimshesi qurylǵannan keıin dárilik zattardyń qozǵalysyn tolyq esepke alý júıesi uıymdastyrylyp, olardy paıdalanýdy baqylaý avtomattandyryldy jáne dárilik taǵaıyndaýlarǵa kúndelikti farmatsevtıkalyq aýdıt engizildi.
Aýrýhananyń dırektory Erbol Sársenbaevtyń aıtýynsha, bólimsheniń alǵashqy jumys jylynyń ózinde ekonomıkalyq tıimdilik 340 mln teńgeni qurady. Sonymen qatar jaǵymsyz janama reaktsııalar sany 60 paıyzǵa, dárilik qatelikter sany 45 paıyzǵa azaıyp, patsıentterdiń shaǵymdary men narazylyqtary 30 paıyzǵa tómendegen.
Gospıtaldyq dárihananyń róliniń ózgerýi de mańyzdy nátıjelerdiń biri boldy. Búginde provızorlar medıtsınalyq kómektiń barlyq kezeńderinde dárilik terapııany baqylaýdy qamtamasyz ete otyryp, emdeý protsesiniń tolyqqandy qatysýshylaryna aınaldy.
Preparattardy arnaıy bokstarda ortalyqtandyrylǵan túrde daıyndaý jáne dárilik zattardy gospıtaldyq farmatsııa qyzmeti arqyly taratý júıesin uıymdastyrý meıirgerlerdi kúndelikti qaıtalanatyn jumystardyń bir bóliginen bosatyp, patsıentterge tikeleı kútim kórsetýge kóbirek ýaqyt bólýge múmkindik berdi.
Óńirlik densaýlyq saqtaý basqarmalary men respýblıkalyq klınıkalardyń qatysýymen ótken apparattyq keńestiń qorytyndysy boıynsha mınıstr klınıkalyq farmakologııa qyzmetin damytý jónindegi Jol kartasynyń sózsiz oryndalýyn qamtamasyz etýdi, eldiń barlyq statsıonarlarynda klınıkalyq farmakologııa jáne gospıtaldyq farmatsııa bólimshelerin ashý jumystaryn jandandyrýdy, sondaı-aq qyzmettiń normatıvtik-quqyqtyq bazasyn jáne kadrlyq qamtamasyz etilýin jetildirý boıynsha usynystar ázirleýdi tapsyrdy.
Osyǵan deıin Densaýlyq saqtaý mınıstrliginiń dári-dármek pen medıtsınalyq jabdyqtardyń saýdasyn retteıtinin habarladyq.
