Dárilik zattardy tirkeý merzimi 2 ese qysqarady — zań jobasy

ASTANA. KAZINFORM — Damyǵan elderde tıimdiligin dáleldegen dárilik zattarǵa jeńildetilgen tirkeý rásimi engiziledi. Bul týraly Májilistiń jalpy otyrysynda «QR-nyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn tanystyrǵan depýtat Ashat Aımaǵambetov aıtty. 

— Aldyńǵy jyly Joǵary aýdıtorlyq palatanyń esebin dál osy jerde tyńdadyq. Depýtattar kóptegen problemany kóterip, suraqtar qoıyldy. Endi osy anyqtalǵan kemshilikterdi joıý úshin arnaıy normalardy daıyndadyq. Dárilik zattardy tirkeý merzimi aıtarlyqtaı qysqartylady, — dedi ol.

Depýtattyń aıtýynsha, qazirgi tańda dárilik zattardy tirkeý rásimi zań boıynsha 210 kúnge deıin sozylady.

— Shynyn aıtar bolsaq, bul protsess jyldap sozylyp ketedi. Sondyqtan tirkeý, saraptama júrgizý, shekti baǵany bekitý jáne ulttyq dárilik formýlıarǵa engizý merzimderin biriktiretin tek bir kompozıttik qyzmet engizýdi usynyp otyrmyz. Bul dárilerdi tirkeý merzimin 210 kúnnen 100 kúnge deıin qysqartýǵa jaqsy múmkindik beredi, — dedi Ashat Aımaǵambetov.

Sonymen qatar ol AQSh, Eýropa syndy elderdi dárilik zattardy tirkeıtin iri uıymdar bar ekenin atap ótti.

— Olar maquldaǵan jańa preparattar úshin jeńildetilgen tirkeý rásimi engiziledi. Eger dári damyǵan elde dáleldengen qaýipsizdik pen tıimdilikke ıe bolsa, onda ol bizdiń azamattarǵa da ýaqytyly qoljetimdi bolýy tıis. Bul sheshim qaıtadan uzaq rásimderdi ótkizbeı-aq qajet dárilerdi tirkep, olardy satyp alýymyzǵa jol ashady. Dál osyndaı tájirıbe Koreıada, Ámirlikterde, basqa da damyǵan basqa memleketterdi keńinen qoldanylady, — dedi Ashat Aımaǵambetov.

Aıta keteıik, atalǵan zań jobasy aıasynda ǵalymdarǵa elimizdegi kez kelgen zerthana qoljetimdi bolady.  Ol úshin atalǵan zań jobasy aıasynda zerthanalardy basqa da ǵalymdarǵa qoljetimdi etý maqsatynda «arnaıy ujymdyq paıdalaný zerthanalary» degen uǵym jáne tıisti tetik engiziledi.