Dárilik zattardy tańbalaý arqyly qandaı máseleler sheshiledi
ASTANA. KAZINFORM - Densaýlyq saqtaý mınıstrligi dárilik zattardy tańbalaýǵa qatysty túsinik berdi, dep habarlaıdy Kazinform.
Atap aıtqanda, dárilik zattardy tańbalaý 2024 jylǵy 1 shildege josparlanyp otyr.
«Dárilik zattardy tańbalaý men qadaǵalaýdy engizýdiń maqsatyna toqtalsaq, ónimdi óndirý kezeńinen bastap túpkilikti naqty patsıentke deıin jetkizilýi barysyn monıtorıngileý eskerilgen. Sonymen qatar, farmakologııalyq qadaǵalaý men dárilik zattardyń sapasyn baqylaýdyń tıimdiligin arttyrý iske asyrylady», - delingen Densaýlyq saqtaý mınıstrliginiń Kazinform agenttigine bergen jaýabynda.
Tańbalaý aıasynda dárilik zattardy satyp alý is-sharalary jaqsartylmaq.
«Munymen qosa, dárilik zattardyń baǵasyn baqylaý júzege asyrylady. Tegin medıtsınalyq kómektiń kepildik berilgen kólemi aıasynda jáne mindetti áleýmettik medıtsınalyq saqtandyrý júıesinde dárilik zattardyń zańsyz aınalymynyń jolyn kesýge, sondaı-aq salyq alymdarynyń ashyqtyǵyn arttyrýǵa erekshe mán beriledi», - dep atalyp ótken habarlamada.
Budan buryn habarlanǵandaı, Densaýlyq saqtaý mınıstrligi elimizdegi dárilik zattar men medıtsınalyq buıymdar naryǵyndaǵy ımport úlesine qatysty málimet berdi.
«Qazaqstan Respýblıkasy Strategııalyq josparlaý jáne reformalar agenttiginiń deregi boıynsha 2022 jyly farmatsevtıka salasynyń óndirisi 162,6 mlrd teńge boldy. 2023 jyldyń 11 aıynda óndiris kólemi 131,0 mlrd teńgege jetti. Sonymen qatar Qarjy mınıstrliginiń derekterine qaraǵanda, 2022 jyly eksport kólemi 32,2 mln AQSh dollary, ımport 1,7 mlrd AQSh dollary shamasynda boldy. Al 2023 jyldyń 11 aıynda farmatsevtıka ónerkásibiniń eksporty 14,4 mln AQSh dollaryn, al ımport 1,6 mlrd AQSh dollaryn qurady», - delingen vedomstvo aqparatynda.
