Dárilik zattardy basqarýda jańa tehnologııalar engizilip jatyr
ASTANA. KAZINFORM — Qazaqstanda dárilik qaýipsizdikti arttyrý jáne emdeýdi tsıfrlandyrý aıasynda Kardıologııa jáne ishki aýrýlar ǵylymı-zertteý ınstıtýtynda gospıtaldyq farmatsııa bólimshesi ashyldy. Jańa júıe dárilerdi avtomattandyrylǵan esepke alý, saqtaý jáne taratý arqyly emniń tıimdiligi men qaýipsizdigin kúsheıtýge baǵyttalǵan. Bul týraly DSM-niń baspasóz qyzmeti málim etti.
Vedomstvonyń málimetinshe, jańa bólimshede emdeýdiń klınıkalyq-farmakologııalyq baǵalaýy, terapııanyń tıimdiligi men qaýipsizdigin monıtorıngileý, emdeýdiń utymdy tańdalýyn qamtamasyz etý jáne dárilik zattardy daıyndaý, sondaı-aq qdárilik zattardy esepke alý jáne saqtaý qoımasy — bólimi boıynsha jumystar júrgiziledi.
Munda tabletkalyq dárilik túrlerdi avtomatty túrde berý jáne qaptaý júıesi engizilgen. Bul naqty dozalaýdy qamtamasyz etip, adam faktorynyń yqpalyn azaıtady jáne dári-dármekti berý protsesin jedeldetedi. Dárilik zattardy saqtaýǵa arnalǵan jańa avtomattandyrylǵan kabınet saqtaý sharttaryn qatań baqylaýǵa, qaldyqtar men jaramdylyq merzimderin naqty ýaqyt rejıminde esepke alýǵa, dárilik preparattardyń saqtalýy men qaýipsizdigin arttyrýǵa, sondaı-aq robottandyrylǵan jetkizý júıesin engizýge múmkindik beredi.
— Avtomattandyrylǵan sheshimderge kóshý dárilik zattardy basqarýdy jańa deńgeıge shyǵarady. Zamanaýı ádisteme preparattardyń ómirlik tsıkline — klınıkaǵa túsken sátten bastap patsıentke berilgenge deıingi úzdiksiz monıtorıngke negizdeledi, bul adam faktoryn barynsha azaıtady, — dedi ınstıtýttyk Basqarma tóraǵasy Rýstem Tóleýtaev dárilik zattardy esepke alý men baqylaýdyń jańa tehnologııalyq ádistemesin tanystyrý barysynda.
Klınıkalyq farmakologııa bóliminiń jetekshisi Aıgúl Baqtyǵalıeva jańa tehnologııalardy engizý IT júıelerdi — 1S býhgalterııany jáne DAMUMED júıesin — biriktirýge, bólimshelerdegi medıtsınalyq personaldyń ýaqytyn ońtaılandyrýǵa, dárilik qamtamasyz etýdiń jyldamdyǵy men sapasyn arttyrýǵa jáne logıstıkalyq shyǵyndardy azaıtýǵa múmkindik beretinin habarlady.
Densaýlyq saqtaý mınıstrliginde atap ótilgendeı, gospıtaldyq farmatsııa bólimshesin qurý dárilik zattardy derbestendirilgen esepke alýdy engizýge, farmakoterapııanyń sapasy men qaýipsizdigin arttyrýǵa, shyǵyndardy ońtaılandyrýǵa jáne emdeý tıimdiligin monıtorıngileýdiń biryńǵaı júıesin qalyptastyrýǵa baǵyttalǵan.
Aıta keteıik, elde MÁMS aıasyndaǵy qyzmet kórsetýshilerge jańa talaptar engiziledi.
