Darııadaǵy sý tolyqtaı qatqanda ǵana qaýiptiń beti seıiledi
QYZYLORDA. QazAqparat - Syrdarııaǵa quıatyn mol sýdyń bastaýynda turǵan qyrǵyz elindegi Toqtaǵul sý qoımasynda búgingi kúni 15 mlrd. 640 mln. tekshe metr sý qory bar.
Bul týraly QazAqparat tilshisi Aral-Syrdarııa basseındik ınspektsııasyna silteme jasap habarlady.
Sý kólemi byltyrǵy jylǵa qaraǵanda birshama kóp. Buǵan bıylǵy jyldyń jaýyn-shashyny da áser etip tur. Byltyr osy mezgilde onda 11 mlrd. 180 mln. tekshe metr sý qory bolǵan. Bul kúnderi tómen qaraı Shardara sý qoımasyna sekýndyna 572 tekshe metrden sý bosatylýda. Al Shardara sý qoımasyndaǵy sýdyń mólsheri 2 mlrd. 688 mln. tekshe metrdi quraıdy. Bul onyń áli de sý qabyldaý áleýetiniń mol ekenin kórsetedi. Odan tómen qaraı 800 tekshe metr sý sekýndyna jiberilýde. Onyń 400 tekshe metrin Kóksaraı sý rettegishi qabyldasa, qalǵany darııa boıymen uly teńizdi betke alyp jóńkýde. Buǵan Arys ózeninen sekýndyna 38 tekshe metr sý qosylýda. Darııadaǵy qaýiptiń áli de bolsa bolýy onyń jyldaǵydaı erte qatpaýynan týyndap otyr. Qazirge kúni Qyzylorda sý torabynan sekýndyna 490 tekshe metr sý ótip jatyr. Uly teńizge onyń 120 tekshe metri jetip jyǵylýda.Sınoptıkter aldaǵy 17-23 qańtar aralyǵynda kún sýytatynyn eskertedi. Sol kezde darııa tolyqtaı qatyp, qaýip birshama seıilýi yqtımal. Al ázirge darııa boıy kúni-túni baqylaýda tur.
