Darııadaǵy sý Qyzylordaǵa qaýip tóndirip turǵan joq
«Respýblıkalyq aqparat agenttiginiń biri 9 qańtarda Qyzylorda sý torabynan ótip jatqan sý mólsheri 704 tekshe metrdi quraıtynyn habarlady. Ol derektiń eshqandaı negizi joq ekenin málimdeımiz. Qazir «Kóksaraı» sý rettegishi 14 qańtardan bastap sekýndyna 200 tekshe metr sý qabyldaýda. Ol buǵan deıin 100-150 tekshe metrdi quraǵan bolatyn.
«Shardara» sý qoımasynan oblys shekarasyna deıin sekýndyna 480 tekshe metr sý kelýde. Al «Qyzylorda» sý tospasynan tómengi aǵysqa sekýndyna 340 tekshe metr sý ótýde. Aıta keterligi, qazir Aral, Qazaly aýdandary men Qarmaqshy aýdanynyń keıbir bóliginde ózende muz ustasyp tur. Jalaǵash, Qarmaqshy aýdandarynda seńniń júrýi 35-40 paıyzdy quraıdy. Darııa deńgeıi turaqty túrde baqylaýda. Tıisti mekemeler mamandary kún saıyn kezekshilik uıymdastyryp keledi. Oblysta sý basý qaýpi bar 56 ýchaske belgilengen. Bul nysandarda126 mekeme boıynsha 1359 adam kezekshilik jasasa, 411 tehnıka daıyndalǵan», - dedi oblystyq jumyldyrý daıyndyǵy basqarmasynyń basshysy Asylbek Shámenov.
«Qazgıdromet» mekemesiniń oblys boıynsha fılıalynyń bas mamany Gúlnar Mamanovanyń aıtýynsha, qańtardaǵy ortasha temperatýra mólsherden 1-2 gradýsqa jyly bolady. Munyń áserinen darııadaǵy seń qozǵalysy jyldaǵy mezgilinen erterek baıqalýy múmkin.