Darııa sýy kúndiz-túni baqylanýda
QYZYLORDA. QazAqparat-Syrdarııa ózeni buǵan deıin habarlanǵandaı, qazir mol sýdy qabyldap jatyr.
Aral-Syrdarııa basseındik ınspektsııasy málimetterine súıensek, naq osy kúnderi qyrǵyz aǵaıyndardyń Toqtaǵul sý qoımasy men joldaǵy ózge de sý jınaıtyn qoımalardan sekýndyna 1190 tekshe metr sý Shardaraǵa túsýde. Odan tómen qaraı sekýndyna 1500 tekshe metr sý bosatylýda, dep habarlady QazAqparat HAA tilshisi.
Shardaradaǵy qazirgi sý mólsheri 4 mlrd. 785 mln. tekshe metrdi quraıdy. Kóksaraı sý rettegishinde 2 mlrd. 883 mln. tekshe metr sý bar. Rettegish shekti mejesine jetip turǵandyqtan sý qabyldamaıdy, ne ony tómen qaraı jibermeıdi. Ózbek tarapymen kelisim negizinde Arnasaı sý oıpaty búginde sekýndyna 350 tekshe metr sýdy ózine alýda. Olarmen aldaǵy ýaqytta da kelisim bolatyn bolsa, Arnasaıdyń munan áldeqaıda kóp sýdy qabyldaý múmkindigi bar. Sońǵy kúnderi Arys ózeni birshama tynshyp sekýndyna 200 tekshe metrdiń ústine shyqqan sý kólemi 143 tekshe metrge deıin tústi.
Qyzylorda oblysynyń aýmaǵyna enteleı kirgen mol sýdyń qazirgi kólemi 1340 tekshe metrdi qurap otyr. Ońtústiktegi qos aýdanda da qaýipsizdik sharalary kúsheıtilgen. Atqarylyp jatqan isterdiń nátıjesinde Qyzylorda sý torabynan bul kúnderi sekýndyna 518 tekshe metr sý ótip jatyr. Darııa boıyndaǵy qaýipti sanalatyn barlyq aımaqtar tegis baqylaýǵa alyndy. Ázirge jaǵdaı turaqty. Degenmen aýa-raıynyń naqty qalaı qubylary belgisiz ekenin de joqqa shyǵarýǵa bolmaıdy. Sol sebepti aldaǵy kúnderi mol sýdy ótkizip jibergenshe tas-túıin daıyndyq jumystary jalǵasa beredi.
