Dáriniń janama áseri týraly qazaqstandyqtardan 943 habarlama túsken

NUR-SULTAN. QazAqparat – Farmakologııanyń zamanaýı damýy jáne jańa dárilik preparattardy keńinen qoldaný emdeý múmkindikterin arttyryp qana qoımaı, sonymen qatar naýqastarda dári-dármekterge degen jaǵymsyz reaktsııalardyń paıda bolý qaýpin arttyrdy. Máselen, Qazaqstanda 2020 jyldyń 8 aıynda dárilik preparattardyń janama áseri týraly 943 habarlama tirkelgen. Shaǵymdardyń basym kópshiligi Almaty qalasynan – 14,2%, Pavlodar oblysynan – 13,7%, Aqtóbe qalasynan - 10% jáne Shymkent qalasynan – 9,1% kelip túsken, dep habarlaıdy QazAqparat.

Aıta keteıik, QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń Dárilik zattar men medıtsınalyq buıymdardy saraptaý ulttyq ortalyǵy medıtsınalyq ónimderdi saraptaýdan ótkizýmen qatar, naryqtaǵy dárilerdiń janama áserlerin qadaǵalaýmen aınalysady.

Halyqtan jáne medıtsınalyq uıymdardan kelgen barlyq habarlama muqııat taldanady. Kúrdeli jaǵymsyz reaktsııa týǵyzǵan faktorlarǵa tekserý júrgiziledi, dárilik zattardyń úlgileri alynady jáne Dárilik zattar men medıtsınalyq buıymdardy saraptaý ulttyq ortalyǵynyń mamandandyrylǵan ortalyqtarynda zerthanalyq synaqtar júrgiziledi. Saraptama qorytyndysy boıynsha Ortalyq preparattyń tirkeý kýáliginiń qoldanylýyn toqtata turý nemese toqtatý týraly ári qaraı sheshim qabyldaý úshin QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetine qorytyndy beredi. Monıtorıng barlyq óńirlerdi qamtıdy jáne halyqaralyq standarttarǵa sáıkes júrgiziledi.

Habarlamalardy taldaý nátıjesi kórsetkendeı, negizinen antıbakterııalyq preparattardan (42,1%), vırýsqa qarsy dárilerden (13,7%) jaǵymsyz áser bolatyny anyqtaldy. Budan keıin ımmýnomodýlıatsııalaýshy preparattar (4,6%), qannyń uıýyna áser etetin jáne/nemese kedergi keltiretin dáriler (4,6%) tur.

«Pandemııa bastalǵan kezde kóptegen azamattar dárigerlerdiń keńesinsiz, baqylaýsyz ózderi de, balalary da dári-dármek qabyldaǵan. Bul olardyń preparattarǵa degen sezimtaldyǵynyń tómendeýine áser etýi múmkin ekenin bári birdeı bile bermeıdi. Bıyl 8 aıda jaǵymsyz reaktsııalar týraly kelip túsken shaǵymdardyń sany ótken jyldyń sáıkes osy kezeńimen salystyrǵanda az, byltyr 1,5 myńǵa jýyq ótinish tústi. Bul azamattar dárilerdi az qabyldaı bastady degen sóz emes. Qatań karantın sharalary engizilgen kezeńde emhanalarǵa barýǵa shekteý qoıylǵany belgili, munda ádette naýqastar emdeýshi dárigermen birge Ortalyqtyń saıtynda «sary» kartany toltyrady. Eger sizde qandaı da bir preparatqa shaǵymdaryńyz bolsa, óz emhanańyzǵa habarlasyp, preparatqa degen jaǵymsyz reaktsııa týraly habarlaýǵa keńes beremiz», — dedi Ortalyq bas dırektorynyń dárilik zattar jónindegi orynbasary Baıan Moldahmetova.

Eske sala keteıik, Dárilik zattar men medıtsınalyq buıymdardy saraptaý ulttyq ortalyǵynyń www.ndda.kz saıtynda dári-dármek qoldanǵan soń jaǵymsyz reaktsııa paıda bolǵan azamattar emdeýshi dárigermen birge toltyratyn karta-habarlama ornalastyrylǵan. Kartada dárilik preparattyń barlyq jaǵymsyz áserlerin, sondaı-aq medıtsınalyq qoldaný jónindegi nusqaýlyqta kórsetilmegen áserlerin, tómen tıimdiligin nemese emdik áseriniń bolmaýyn, dáriniń mólsherden tys berilýine kúdik týǵanyn kórsetý qajet.