Dáriniń jaǵymsyz áseri, baǵasy týraly aqparatty qaıdan alýǵa bolady
Naqtyraq aıtqanda, dárilik zattyń jaǵymsyz áseri baıandalatyn karta-habarlamalar nemese «sary kartalar» dep atalatyn aqparat paraqsharalaryn jiberýge arnalǵan jańa qyzmet iske qosylyp otyr. Bul rette halyq dárilik zattardyń qoldanýdan keıingi jaǵymsyz reaktsııalary týraly aqparatty Dárilik zattar men medıtsınalyq buıymdardy saraptaý ulttyq ortalyǵynan onlaın rejımde jedel alady.
Karta-habarlamany jiberý úshin qosymshadaǵy «Janama áseri» bólimin ashyp, patsıent jáne preparat týraly málimetterdi toltyryp, sondaı-aq keri baılanys jáne qajet bolǵan jaǵdaıda aqparatty naqtylaý úshin baılanys derekterin kórsetý kerek. Ulttyq ortalyqtyń Farmakologııalyq qadaǵalaý departamentiniń basshysy Málik Ábdirahmanovtyń aıtýynsha, atalǵan qosymsha halyqpen ózara baılanysýǵa arnalǵan tıimdi qural qyzmetin atqarady. Mobıldi qosymshadaǵy jańa qyzmet dárilik preparattardyń qaýipsizdigin baqylap, farmakologııa naryǵy aınalymyna qatysýshylarmen baılanysta bolýǵa septigin tıgizedi.
Budan bólek, DariKZ mobıldi qosymshasynyń jańa nusqasy arqyly dárihanalardaǵy dári-dármekterdiń baǵasy ruqsat etilgen shekten asyra qoıylǵan jaǵdaılarǵa shaǵymdar túsirýge bolady. Bul rette paıdalanýshy dári baǵasynyń asa qymbat bolyp, onyń shekti baǵadan asyra qoıylǵandyǵyn habarlaýyna shaǵymdana alady. Jalpy, dárihanadaǵy baǵaǵa shaǵym túsirý úshin birneshe qarapaıym qadam jasaý qajet. Birinshiden, DariKZ mobıldi qosymshasynan shekti baǵasy belgilengen qajetti preparatty taýyp, ekinshiden, «Baǵaǵa shaǵym túsirý» tetigin basý kerek. Budan ári qajetti jolaqtardy toltyryp, habarlama joldanady.
Sonymen qatar, halyq DariKZ qosymshasy arqyly uqsas preparattarǵa qoıylatyn baǵalardy salystyra alady. Dáriniń retsept arqyly nemese retseptisiz beriletinin, sáıkestik sertıfıkatyn tekserip, óndirýshi, medıtsınada qoldanylýy, saqtaý merzimi týraly jáne t.b. derekterdi bile alady.
