Dáriniń shekti baǵasy otandyq kásiporyndarǵa keri áserin tıgizýi múmkin - «Atameken» kásipkerler palatasy

ASTANA. QazAqparat - «Atameken» ulttyq kásipkerler palatasy dári-dármekterdiń shekti baǵasyn engizgende birqatar ózekti máselelerdi eskerýdi suraıdy, dep xabarlaıdy QazAqparat tilshisi.

Palata tóraǵasynyń orynbasary Nurjan Áltaevtyń aıtýynsha, qazirgi kezde farmatsevtıkalyq preparattar naryǵynda ónimniń tek 11 paıyzy ǵana otandyq kásiporyndarǵa tıesili. Qalǵan bóligi syrttan keledi. «Endi, shekti baǵany engizse, aldymen otandyq kásiporyndar baqylaýǵa alynady degen qaýip bar. Densaýlyq saqtaý mınıstrligi sheteldik kompanııalardyń baǵalary retteı almaıdy. Máselen, «Bıgfarma»  sııaqty iri kompanııalar óz baǵasynyń qalaı qurylatynyn aıtpaıdy da. Qazirgi kezde dál osy ımporttyq dári-dármekterdiń baǵasy ósip otyr. Al otandyq preparattardyń baǵasy áldeqaıda tómen bolyp tur. Sondyqtan qosymsha baqylaý sharalary otandyq kásiporyndardyń jaǵdaıyn qıyndatyp jiberýi ábden múmkin» , - dedi Áltaev Úkimettiń búgingi otyrysynda.

QR Densaýlyq saqtaý mınıstri Eljan Birtanovtyń sózine qaraǵanda, elimizde dári-dármekterdiń shekti baǵasyn engizý tujyrymdamasy áli de talqyǵa salynatyn bolady. Oǵan otandyq kásiporyndar da qatysady. «Jalpy, bul - álemdik tájirıbe. Sondyqtan biz ortaq bir sheshimge kelemiz de oılaımyn» , - deıdi Birtanov.

Osy oraıda Premer-Mınıstr zań jobasyn talqylaýdy tezdetip bastaýdy júktedi. Sebebi bir jarym aıdan keıin atalǵan qujatty Parlament Májilisine engizý josparlanǵan.

Aıta keteıik, Úkimettiń búgingi otyrysynda QR Densaýlyq saqtaý mınıstri Eljan Birtanov dári-dármekterdiń baǵasy boıynsha baıandama jasady. Onyń aıtýynsha, naqty bir dári-dármekti tapshylyǵy týyndasa, ústeme baǵa 200 protsentke deıin ósip ketedi.