Dárini retsepsiz satqan dárihanaǵa qansha aıyppul salynady

Bul týraly búgin QR Densaýlyq saqtaý mınıstrliginiń Farmatsııa komıteti Nur-Sultan qalalyq departamenti basshysynyń mindetin atqarýshy Eraly Nurǵazın aıtty, dep habarlaıdy QazAqparat tilshisi.

«Dári-dármekti retsepsiz bosatqan jeke tulǵaǵa 70-ten 100 AEK-ke deıin, al bıznes sýbektilerge 130-dan 1 000 AEK-ke deıin aıyppul salynady», - dedi ol elordadaǵy №7 emhanada ótken baspasóz máslıhatynda.

Degenmen, ol elorda dárihanalarda dári-dármekterdi retsepsiz satý derekteriniń azaıyp kele jatqandyǵyn aıtty.

«Tolyqtaı alǵanda, azaıý tendentsııasy baıqalady. Sebebi biz emhanalarmen jáne dárihanalarmen birge jumys istep jatyrmyz. Biraq, problema áli de qalyp otyr. Sondyqtan baspasóz máslıhatyn ótkizdik», - dedi ol.

Al Nur-Sultan qalalyq qoǵamdyq densaýlyqty qorǵaý departamenti basshysynyń orynbasary Maral Jurynova mundaı oqıǵalardyń aldyn alý úshin qoldanylatyn sharalar, onyń ishinde «Astana densaýlyqty tańdaıdy» jobasy týraly aıtty.

«Osy jobanyń aıasynda biz elordadaǵy barlyq dárihana jelisine aqparattyq paraqshalar taratyp, aqparattyq taqtaılar shyǵardyq. Bul taqtaılar elordanyń barlyq dárihanalarynda bar. Onda antıbıotıkter ǵana emes sonymen birge gormondyq ta, steroıdty da dáriler retseptimen satylýy tıistigi aıtylǵan», - dedi M.Jurynova.