Daryndy balany qoldaıtyn «Qazaqstan-Sırıýs» jobasy aýyl mektepterine deıin keńeıtiledi
ASTANA. KAZINFORM — Daryndy oqýshylardy qoldaıtyn «Qazaqstan-Sırıýs» jobasy Astana men Almatydan basqa óńirlerge, onyń ishinde aýyl mektepterine deıin keńeıtiledi. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Mınıstrdiń aıtýynsha, búginde elimizde zamanaýı bilim ınfraqurylymy qalyptasyp, kásibı pedagogter korpýsy jasaqtalǵan. Sondaı-aq STEM, IT, robototehnıka jáne tsıfrlyq tehnologııalardy damytýǵa qajetti baza quryldy.
Endigi mindet — osy áleýetti sapaly ári tehnologııalyq ult qalyptastyrýǵa baǵyttaý.
— Bizdińshe, sapaly ult — tereń bilimdi, kitap oqıtyn, eńbekqor, jaýapty, zań men tártipti temirqazyq tutqan ult. Al tehnologııalyq ult — jańa tehnologııany ózi jasaıtyn, jańa ónim, ınjenerlik jáne ǵylymı sheshim usynatyn ult. Árıne, tehnologııalyq sapaly ult mektepte qalyptasady, — dedi Juldyz Súleımenova.
Sondyqtan ár bala sapaly bilim alýy kerek. Al qabileti men qyzyǵýshylyǵy aıqyndalǵan oqýshylarǵa tereńdetilgen bilim alyp, zertteý júrgizýge jáne óz ıdeıasyn naqty jobaǵa aınaldyrýǵa múmkindik berilýi shart.
Osy baǵyttaǵy jumystyń jalǵasy retinde Astana men Almatyda balanyń darynyn júıeli túrde qoldaýǵa negizdelgen model — «Qazaqstan-Sırıýs» jobasy júzege asyrylyp jatyr. Bala tek bilim alyp qana qoımaı, zertteýdi, jańa nárse jasaýdy jáne tyń sheshimder tabýdy úırenedi.
Mınıstr Qazaqstannyń «Sırıýs» bilim berý ortalyǵymen yntymaqtastyqty jalǵastyratynyn, sonyń ishinde aýyl mektepterine taratý negizgi mindetterdiń biri ekenin aıtty.
— Bilimniń sapasy akademııalyq nátıjelermen ǵana ólshenbeıdi. Bizdiń mindetimiz — elimizdiń qundylyqtaryn tereń túsinetin jaýapty azamat tárbıeleý. Búgingi jıynǵa mazmun berip, áńgimege arqaý bolǵan Jańa Konstıtýtsııamyzdyń qundylyqtaryn jas urpaqtyń sanasyna sińirý — óz aldyna uly mindet, — dedi Juldyz Súleımenova.
Búginde 8 myńnan astam mektepte jańa Konstıtýtsııaǵa arnalǵan ashyq sabaqtar ótkizilgen. Sonymen qatar pedagogterdiń biligin arttyrý kýrstary uıymdastyrylyp jatyr.
— Jańa Konstıtýtsııamyzdy túsindirý, onyń azamat úshin eń basty qujat ekenin sezindirý baǵdarlamasy qolǵa alyndy. Oqýlyqtarymyz da jańa Konstıtýtsııa turǵysynan josparly túrde qaıta qaraldy, — dedi Juldyz Súleımenova.
Aıta keteıik, Astanada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
Qazaqstanda 2019 jyldan beri 511 jańa aýyl mektebi salynǵan.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
