Daryndy balany qalaı tárbıeleý kerek – 7 jasar matematık balanyń anasynyń keńesi

ASTANA. KAZINFORM — Astanada matematıkanyń jiligin shaǵyp, maıyn ishken daryndy bala turady. Nebári 7 jastaǵy Baqdáýlet Nurlan halyqaralyq olımpıadadan chempıon atanyp úlgergen. Bilimpaz 1-synyp oqýshysy anasymen birge «Búgin LIVE» baǵdarlamasyna qonaq boldy.

– Balam osy jyldyń aqpan aıynda Sıngapýr elinde ótken Halyqaralyq olımpıadaǵa qatysyp keldi. STEMCo olımpıadasynyń irikteý týrynda 33 elden kelgen úmitkerler qatysty. Al fınalǵa 13 eldiń qatysýshylary ótipti. Solardyń biri bolyp biz Qazaqstannyń atynan bardyq. 1-synyptan 2 oqýshy boldy. Baqdáýlet altyn medal ıelendi. Ekinshi oqýshymyz qola júlde aldy, – deıdi Áıgerim Aıtpaeva.

Daryndy oqýshynyń anasy balasynyń qabiletin qalaı baıqaǵanyn aıtyp berdi.

– Baqdáýlet esepti oıyn oınaǵan sekildi shyǵarady. Únemi labırınt sekildi logıkalyq oıyndar oınaıdy. Kishkentaı kezinen logıkalyq oıyndarǵa qyzyǵatynyn baıqadym. 2 jasynda áli tili durys shyqpasa da, barlyq geometrııalyq fıgýralardy jatqa biletin. Trapetsııa, parallelogramm, parallelepıpedti bir-birinen aıyryp, aıtyp beretin. Sodan keıin geometrııalyq fıgýralardy kúndelikti ózi qoldanatyn zattardyń ishinen izdep júredi. Pazl quraǵandy óte jaqsy kóretin. 3 jasqa kelgende bizden shahmat surap, shahmat oınaýdy úırendi, – deıdi Baqdáýlet Nurlannyń anasy.

Bilimdi búldirshinniń ata-anasy da matematıkadan alys emes eken. Sodan bolar, anasy balasynyń bul qarymyn daryndylyqqa balaıdy.

– Men matematıkadan asa qınalmaımyn. Ózim de mektep kezinde fızıkadan halyqaralyq jobalardan júlde alǵanmyn. Ákesi de matematıkaǵa jaqyn. Sondyqtan Baqdáýletke daıyndyqtan buryn áýeli Qudaıdan daryn berilgen dep oılaımyn. Biz balamyzdy eshteńege arnaıy úıretken joqpyz. Óziniń qyzyǵýshylyǵyna qarap tárbıeledik. Osy tusta Baqdáýlettiń ustazdary da balamnyń qarym-qabiletin baıqap, minezin asha bildi, – deıdi ol.

Áıgerim Aıtpaeva daryndy bala tárbıeleýdegi otbasylyq tájirıbesi jóninde aıtty.

– Ata-ana retinde balanyń qabiletin baıqaǵanda, ony mindetti túrde ary qaraı damytý kerek. «Bulaq kórseń – kózin ash» dep tekke aıtpaǵan ǵoı. Balanyń qabileti qaı baǵytta baıqalsa, sol baǵytta damytý kerek. Biz, mysaly, logıkaǵa, matematıkaǵa qyzyǵýshylyǵyn baıqap, Baqdáýletti robototehnıka úıirmesine berdik. Ol da mıdy damytady. Biz úıde de kvest jasaımyz. Oıyndardy tapsyrma sekildi oınaımyz. Mysaly, skanvordty sheshý kerek. Al onyń jaýabynda kelesi tapsyrma qoı bólmede turǵany jasyrylǵan. Kvesttyń sońynda balamyzǵa syılyq beremiz, – deıdi anasy.

Aıta keteıik, buǵan deıin qazaqstandyq 4 oqýshy halyqaralyq matematıkalyq olımpıadada el namysyn qorǵaıtynyn habarlaǵan edik.