«Daryn» syılyǵyna kimder úmitker bola alady
ASTANA. KAZINFORM — Búgin «Daryn» memlekettik jastar syılyǵyna úmitkerlerden ótinim qabyldaý bastaldy. Bul týraly Mádenıet jáne aqparat mınıstrligi Jastar jáne otbasy isteri komıteti tóraǵasynyń mindetin atqarýshy Birjan Álimjanov málim etti.
— Konkýrs 10 nomınatsııa boıynsha ótkiziledi. Olar: «Ádebıet», «Ǵylym», «Dızaın jáne beıneleý óneri», «Jýrnalıstıka», «Klassıkalyq mýzyka», «Qoǵamdyq qyzmet», «Sport», «Teatr jáne kıno», «Estrada», «Halyq shyǵarmashylyǵy». Demek, biz jastardyń qabiletin bir salamen ǵana shektemeımiz. Konkýrsqa Qazaqstan Respýblıkasynyń 35 jasqa deıingi azamattary qatysa alady. Úkimetkerler halyqaralyq jáne respýblıkalyq konkýrstardyń, festıvaldar men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq túrli salalarda qoǵamdy damytýǵa naqty úles qosyp júrgen azamattar bolýy tıis. Qujat qabyldaý búgin, ıaǵnı, 17 maýsymda bastalyp, 17 qyrkúıekke deıin jalǵasady, — dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, syılyq alýǵa úmitkerlerdi usynýdy ortalyq, jergilikti jáne ózge de memlekettik organdar, qoǵamdyq birlestikter men Qazaqstan Respýblıkasynyń aýmaǵynda tirkelgen ózge de zańdy tulǵalar júrgizedi.
— Syılyq alýǵa usynylǵan úmitkerler arnaıy qurylǵan komıssııa arqyly qaralady. Ol birneshe kezeńnen turady. Birinshi kezeńde ótinimder salalyq sektsııa deńgeıinde jan-jaqty zerdelenedi. Ekinshi kezeńde komıssııanyń qorytyndy sheshimi qabyldanady. Komıssııa quramyna ýákiletti organdardyń, ortalyq memlekettik organdardyń ókilderi, ǵalymdar, shyǵarmashylyq sala mamandary, memleket jáne qoǵam qaıratkerleri, belgili sport sheberleri, Prezıdent janyndaǵy Jastar saıasaty jónindegi keńes músheleri engiziledi, — dedi Birjan Álimjanov.
Aıta keteıik, «Daryn» memlekettik jastar syılyǵy — ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda usynylady.
