«Daryn» memlekettik jastar syılyǵyna ótinim qabyldaý jalǵasyp jatyr
ASTANA. KAZINFORM — 26 maýsymnan 27 tamyzǵa deıin Qazaqstan Respýblıkasy Mádenıet jáne aqparat mınıstrligi «Daryn» memlekettik jastar syılyǵyna úmitkerlerden ótinim qabyldaýdy jalǵastyrady. Bul týraly Mádenıet jáne aqparat mınıstrligi málim etti.
«Daryn» memlekettik jastar syılyǵy ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda tabystalady.
Baıqaý «Ádebıet», «Ǵylym», «Dızaın jáne beıneleý óneri», «Jýrnalıstıka», «Klassıkalyq mýzyka», «Qoǵamdyq qyzmet», «Sport», «Teatr jáne kıno», «Estrada», «Halyq shyǵarmashylyǵy» atty 10 nomınatsııa boıynsha ótedi.
Konkýrsqa Qazaqstan Respýblıkasynyń 35 jasqa deıingi azamattary qatysa alady. Olar halyqaralyq jáne respýblıkalyq konkýrstardyń, festıvalder men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq atalǵan salalar men tutastaı qoǵamdy damytýǵa yqpal etken úmitkerler bolýy qajet.
«Daryn» jastar syılyǵyna úmitkerlerdi ortalyq, jergilikti jáne ózge de memlekettik organdar, qoǵamdyq birlestikter jáne Qazaqstan Respýblıkasynyń aýmaǵynda tirkelgen ózge de zańdy tulǵalar usynady.
Jeńimpazdarǵa «Daryn memlekettik jastar syılyǵynyń laýreaty» ataǵy beriledi jáne olar dıplommen, tósbelgilermen sondaı-aq qarjylaı syılyqpen marapattalady.
«Daryn» jastar syılyǵy 1992 jyly taǵaıyndalǵan. Sodan beri atalǵan syılyqty túrli saladaǵy 360-tan astam azamat ıelendi.
Konkýrsqa qatysýǵa qujattar 2025 jylǵy 26 maýsymnan 27 tamyz aralyǵynda Qazaqstan Respýblıkasy Mádenıet jáne aqparat mınıstrligi (qaǵaz nusqada) myna mekenjaı boıynsha qabyldaıdy: Astana qalasy, Máńgilik el dańǵyly 8, «Mınıstrlikter úıi» ǵımaratynyń 14-kireberisi.
Eske sala keteıik, «Daryn» jastar syılyǵy 35 jasqa deıingi azamattarǵa beriledi.