«Daryn» memlekettik jastar syılyǵyna baıqaý jarııalandy
ASTANA. KAZINFORM — «Daryn» memlekettik jastar syılyǵy — ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda usynylady.
Mádenıet jáne aqparat mınıstrliginiń baspasóz qyzmeti málimetinshe, baıqaý «Ádebıet», «Ǵylym», «Dızaın jáne beıneleý óneri», «Jýrnalıstıka», «Klassıkalyq mýzyka», «Qoǵamdyq qyzmet», «Sport», «Teatr jáne kıno», «Estrada», «Halyq shyǵarmashylyǵy» atty 10 nomınatsııa boıynsha ótedi.
Syılyq alýǵa halyqaralyq jáne respýblıkalyq konkýrstardyń, festıvalder men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq qyzmeti ınnovatsııalyq jáne tıisti sala men tutastaı qoǵamdy damytýǵa yqpal etken Qazaqstan Respýblıkasynyń 35 jasqa deıingi azamattary úmitker bola alady.
«Daryn» jastar syılyǵyn alýǵa kandıdatýralardy ortalyq, jergilikti jáne ózge de memlekettik organdar, qoǵamdyq birlestikter jáne Qazaqstan Respýblıkasynyń aýmaǵynda tirkelgen ózge de zańdy tulǵalar júrgizedi jáne mynadaı qujattardy qaǵaz jáne elektrondyq túrde jiberedi:
1) kandıdattyń jeke basyn kýálandyratyn qujattyń kóshirmesi;
2) osy Qaǵıdalarǵa qosymshaǵa sáıkes nysan boıynsha «Daryn» memlekettik jastar syılyǵyn alýǵa arnalǵan tirkeý ótinimi;
3) ótinishhat pen syılyq alýǵa izdenýshiniń jetistikteri týraly anyqtama;
4) marapattaý dıplomdarynyń, gramotalardyń, alǵys hattardyń kóshirmeleri (bolǵan jaǵdaıda);
5) kandıdattyń nemese kandıdat týraly maqalalardyń, jarııalanymdardyń kóshirmeleri (bolǵan jaǵdaıda);
6) banktik shottyń bolýy týraly anyqtamanyń kóshirmesi;
7) kandıdattyń jetistikteri týraly rastaıtyn materıaldar (bolǵan jaǵdaıda).
Jeńimpazdarǵa «Daryn memlekettik jastar syılyǵynyń laýreaty» ataǵy beriledi jáne olar dıplommen, tósbelgimen sondaı-aq qarjylaı syılyqpen marapattalady.
Aıta keteıik, «Daryn» jastar syılyǵy 1992 jyly taǵaıyndalǵan. Ár jyldary atalǵan syılyqty túrli saladaǵy 380-dan astam azamat ıelengen bolatyn.
— Konkýrsqa qatysýǵa qujattar 2026 jylǵy 17 maýsymnan 17 qyrkúıek aralyǵynda (qosa alǵanda) Qazaqstan Respýblıkasy Mádenıet jáne aqparat mınıstrligi (qaǵaz nusqa) myna mekenjaı boıynsha: Astana qalasy, Máńgilik el dańǵyly 8, «Mınıstrlikter úıi» ǵımaratynyń 14-kireberisinde, al (elektrondyq nusqa) daryn2026kz@gmail.com poshtasy arqyly qabyldanady. Anyqtama telefondary: 8 (7172) 74-05-25, 8 (7172) 74-18-43, (jumys kúnderi, saǵ. 9:00–den 18:30–ǵa deıin), — delingen habarlamada.
Buǵan deıin Dastan Sátpaev «Daryn» memlekettik jastar syılyǵyn alǵanyn jazǵan edik.
