504 ótinimnen 20 adam tańdaldy: «Daryn» syılyǵynyń úmitkerleri belgili boldy
ASTANA. KAZINFORM — «Daryn» memlekettik jastar syılyǵyn berý jónindegi konkýrstyq komıssııanyń qorytyndy otyrysy ótti. Jıynǵa Mádenıet jáne aqparat mınıstri Arman Qyryqbaev qatysty.
— Bıyl syılyqqa 504 ótinim tústi. Aldyn ala tekserý qorytyndysynda onyń 429-y konkýrstyq komıssııanyń qaraýyna jiberildi. Іrikteý 10 atalym boıynsha júrgiziledi. Eń kóp ótinim «Ǵylym» — 119 jáne «Qoǵamdyq qyzmet» — 75 atalymdary boıynsha qabyldandy. «Teatr jáne kıno» atalymyna — 58, «Halyq shyǵarmashylyǵy» — 43, «Klassıkalyq mýzyka» — 30, «Ádebıet» — 23, «Estrada» jáne «Dızaın jáne beıneleý óneri» atalymdarynyń árqaısysyna 22, «Sport» — 20, «Jýrnalıstıka» atalymyna 17 ótinim tústi, — delingen habarlamada.
Komıssııa quramynda Quryltaı depýtattary, ortalyq memlekettik organdardyń ókilderi, ǵalymdar, mádenıet jáne óner qaıratkerleri, qoǵam qaıratkerleri, Qazaqstan Respýblıkasy Prezıdentiniń janyndaǵy Jastar saıasaty jónindegi keńestiń músheleri, kásipkerler jáne Prezıdenttik jastar kadr rezerviniń ókilderi bar.
Іrikteý eki kezeńnen turdy. 27-29 qazan aralyǵynda tıisti baǵyttar boıynsha alty sektsııalyq otyrys ótti. Jıyn qorytyndysy negizinde komıssııanyń qorytyndy otyrysyna usynystar ázirlendi.
Komıssııa jumysynyń nátıjesinde on nomınatsııanyń árqaısysy boıynsha eki adamnan barlyǵy 20 úmitker anyqtaldy.
Mádenıet jáne aqparat mınıstri Arman Qyryqbaev komıssııa múshelerine atqarǵan jumysy úshin alǵys bildirdi. Mınıstr úmitkerlerdi ádil ári jan-jaqty baǵalaýdyń, elimizdegi talantty, bastamashyl jastardy qoldaýdyń mańyzyn atap ótti.
«Daryn» memlekettik jastar syılyǵynyń ıegerlerin marapattaý rásimi 26 qarashada ótedi.
Osydan buryn Dastan Sátpaev «Daryn» memlekettik jastar syılyǵyn alǵanyn jazǵanbyz.
