Dárilik zattar naryǵynda kartel anyqtaldy
ASTANA. QazAqparat - Qazaqstan Respýblıkasynyń monopolııaǵa qarsy organy dárilik zattar naryq sýbektileri arasyndaǵy karteldik kelisimdi anyqtady, dep habarlaıdy QR Ulttyq ekonomıka mınıstrliginiń baspasóz qyzmeti.
«SK-Farmatsııa» JShS tegin medıtsınalyq kómektiń kepildik berilgen kólemi sheńberinde dárilik zattardy saqtaý jáne tasymaldaý qyzmetterin satyp alýdy júzege asyrǵan kezde birneshe naryq sýbektisi satyp alýda kartel ókilderiniń biriniń qatysýy jáne keıinnen alynǵan kólemdi kelisimge qalǵan qatysýshylar arasynda teń bólý týraly aldyn ala kelisim jasasqany anyqtaldy.
Osylaısha, osy kelisim satyp alýǵa qatysýshylar men dárilik zattardy saqtaý jáne tasymaldaý qyzmetteriniń basqa áleýetti ónim berýshileri arasynda básekelestikti boldyrmaǵan.
Kartelge úsh qatysýshyǵa qatysty ákimshilik ister qozǵaldy, olar naryq sýbektileriniń ornalasqan jeri boıynsha sottardyń qaraýynda jatyr.
Búgingi kúni Almaty qalasy sottarynyń 2017 jylǵy 7 aqpandaǵy jáne 11 sáýirdegi sheshimderimen kartelge qatysýshylardyń biri - «Medservıs plıýs» Qazaq farmatsevtıkalyq kompanııasy» JShS kináli dep tanyldy jáne 208 mln. teńge mólsherindegi monopolııalyq tabysy tárkilenip, 114,9 mln. teńge mólsherinde ákimshilik aıyppul salyndy.
Kartelge basqa qatysýshylar boıynsha sot talqylaýlarynyń nátıjeleri týraly qosymsha habarlanatyn bolady.
Bul is 2010 - 2015 jyldar kezeńinde tegin medıtsınalyq kómektiń kepildik berilgen kólemi sheńberinde dárilik zattardy saqtaý jáne tasymaldaý qyzmetterin bir lotpen satyp alǵan «SK-Farmatsııa» JShS-ǵa qatysty buryn júrgizilgen monopolııaǵa qarsy tergep-tekserýdiń jalǵasy bolyp tabylady.
2017 jylǵy 16 naýryzda «SK-Farmatsııa» JShS 1,3 mlrd. teńge mólsherindegi ákimshilik aıyppuldy memleket bıýdjetine tolyq tóledi.
