Dárilik zattar men medıtsınalyq maqsattaǵy buıymdardy satyp alý rásimderin túsindirýge arnalǵan keńes ótti
ASTANA. 10 tamyz. QazAqparat - Búgin Qazaqstan Respýblıkasy Densaýlyq saqtaý mınıstrliginde Medıtsınalyq jáne farmatsevtıkalyq qyzmetti baqylaý komıtetiniń tóraǵasy B. Baıserkınniń tóraǵalyǵymen
dárilik zattar men medıtsınalyq maqsattaǵy buıymdardy satyp alý rásimderin túsindirý máseleleri boıynsha keńes ótti. Bul týraly vedomstvonyń baspasóz qyzmetinen habarlandy.
Keńeske «Nur-Otan» HDP, quqyq qorǵaý organdarynyń, úkimettik emes uıymdardyń, kásibı qaýymdastyqtardyń, farmatsevtıkalyq kompanııalardyń, Biryńǵaı dıstrıbıýtor jáne mınıstrliktiń qurylymdyq bólimsheleriniń ókilderi qatysty.
Biryńǵaı dıstrıbıýtor tegin medıtsınalyq kómektiń kepildik berilgen kólemi sheńberinde densaýlyq saqtaý salasyndaǵy ýákiletti organ bekitken tizimge sáıkes medıtsına uıymdaryna dárilik zattardy, medıtsınalyq maqsattaǵy buıymdardy satyp alýdy jáne jetkizýdi júzege asyrady. Biryńǵaı dıstrıbıýtordyń satyp alý rásimi Qazaqstan Respýblıkasy Úkimetiniń qaýlysymen bekitilgen dárilik zattardy uıymdastyrý jáne satyp alý erejesine sáıkes básekelestikti, jarııalylyqty, shynaıylyqty, satyp alý rásiminiń ashyqtyǵyn qamtamasyz etý maqsatynda únemi jetildirilip otyrady.
Keńeste kórsetilgen erejege dárilik zattardy satyp alýdy jeńildetý, artyq ákimshilik tosqaýyldardy joıý boıynsha ózgerister men tolyqtyrýlar engizý jóninde usynystar talqylandy.
