Dárilik preparattardy retsepsiz satqan farmatsevter jazalandy
KÓKShETAÝ. QazAqparat - Kókshetaýda farmatsevter dárilik preparattardy retsepsiz jibergeni úshin ákimshilik jaýapkershilikke tartyldy. Bul týraly QazAqparat Aqmola oblysynyń Polıtsııa departamenti baspasóz qyzmetine silteme jasap habarlaıdy.
Vedomstvonyń málimeti boıynsha, qarashanyń 19-nan bastap, oblys aýmaǵynda «Dopıng» jedel aldyn alý sharasy júrgizilýde. Sharanyń sheńberinde tártip saqshylary emdeý-aldyn alý mekemesi, dárihana, qoıma jáne ónerkásiptik kásiporyndarda, ıaǵnı, qyzmetinde psıhotroptyq jáne ýly zattar qoldanalytan nysandarda tekseris júrgizýde.
Sharanyń alǵashqy kúni arnaıy operatsııa kezinde polıtseıler esirtki quraldarynyń aınalymy kezinde birqatar zań buzýshylyqtardyń oryn alǵanyn anyqtady.
«Máselen, Kókshetaý qalasynda polıtseıler jergilikti dárihanalardyń birinde farmatsevterdiń dárilik preparattardy retsepsiz satqany anyqtady. Farmatsevterdiń bul áreketi QR ÁQbK 426- babynyń 1-bóligi (farmatsevtıkalyq qyzmet jáne dárilik quraldardyń aınalym salasy, medıtsnalyq maqsattaǵy ónimder jáne medıtsınalyq tehnıka erejeleriniń buzylýy) ákimshilik zańbuzýshylyq retinde tirkelip otyr. Atalǵan sanktsııa boıynsha 70 AEK kóleminde aıyppul qarastyrylǵan», - deıdi vedomstvodaǵylar.
Sonymen qatar, tártip saqshylary osyndaı zań buzýshylyqtardy Kókshetaý, Stepnogor jáne Býrabaı aýdany aýmaǵynda anyqtady.
«Dopıng» jedel aldyn alý sharasy kezinde ózge de esirtki qylmystary anyqtalyp, joldary kesildi. Bir táýliktiń ishinde Atbasar, Aqkól, Bulandy, Esil, Jaqsy aýdandary men Kókshetaý jáne Stepnogor qalalarynda QR QK 296-babynyń 1-3 bóligi (esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý) boıynsha 9 qylmys anyqtaldy.
