Dárihanalardaǵy dári baǵasy nege ártúrli
Facebook-tegi «Astana, hochý pohvalıt/pojalovatsıa» tobyna Dınara Abdramanova esimdi qoldanýshy dári-dármek baǵasynyń ártúrli bolýyna qatysty shaǵym jazdy.
«Maǵan dárihanalardy kim, qalaı tekseretini qyzyq. Jaqynda balalar kardıoortalyǵynda driger qabyldaýynda boldym. Meniń qyzyma – ashyq arterııalyq tútik (AAT) dıagnozy qoıylǵan. Dáriger bizge 2 aı boıy qabyldaıtyn dári jazyp, tapsyrys beretin jerdiń nómirin berdi. Men ol nómirge habarlasyp, «Terra Farm» JShS-ǵa WhatsApp arqyly dáriniń ataýyn jazyp jiberdim. Olar eseptep, 9 600 teńge bolatynyn aıtty. Men salystyryp kórý úshin «Gıpokrat» JShS-ǵa habarlasyp, baǵasyn surap edim, olar 2 270 teńge ekenin aıtty. Bir dáriniń baǵasy eki dárihanada jer men kókteı. Ne úshin olaı? Tipti, jeke menshik dárihanalar 20%-dan artyq qospaıdy. Men tań qalyp otyrmyn!», - dep jazǵan áleýmettik jeli qoldanýshysy Facebook-tegi atalǵan topqa.
Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti dáriniń baǵasyn qalaı baqylaýǵa bolatynyn aıtty.
«Bizdiń departamentke aryzdanǵan jaǵdaıda shaǵym jasalǵan dárihanany habardar etýimiz kerek. Sodan soń 2 aptadan keıin baryp teksere alamyz. Bıznesti tekserýge moratorıı jarııalanǵanyna baılanysty shaǵymǵa qatysty tekserý tártibi osyndaı. Taǵy bir aıta ketetin jaıt, ınternette jáne uıaly telefondarda portal.dari.kz degen qosymsha bar. Ol jerde barlyq dári-dármektiń ataýy men qaı dárihanada qansha teńgeden satylyp turǵany, eń kóp degende qansha teńgege satylatyny týraly málimet bar. Atalǵan keıipker shaǵymdanǵan dárihanaǵa baryp, osy qosymshany ashý arqyly dáriniń baǵasyn kórsetip, «Mine, myna jerde eń kóp degende osynsha teńgege satylatyny jazylǵan, Sizder nege birneshe ese kóp baǵaǵa satasyzdar?» dep suraýyna bolady», - dep jaýap berdi Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti.
