Dárihanadan retsepti boıynsha morfın alyp, ony ózgelerge satyp kelgen jambyldyq áıel ustaldy

Bul týraly búgin QR ІІM  Til saıasaty jáne aqparat departamentiniń bastyǵy Nurdildá Oraz málim etti.

Onyń aıtýynsha, aqpan aıynyń basynda Jambyl oblysynyń polıtsııasyna satý maqsatynda geroındi zańsyz saqtaý faktisi týraly jedel aqparat kelip túsken. Jedel is-sharalar barysynda esirtki qylmystary úshin buryn birneshe ret sottalǵan 34 jáne 27 jastaǵy eki jergilikti turǵyn ustaldy. Sonymen birge kúdiktilerdiń esirtki zaty - morfındi jaqsy tanys emes áıelden alyp satatyndyqtary anyqtalǵan.

«Odan ári is-sharalardy ótkizý kezinde morfındi satyp júrgen 50 jastaǵy áıel adam anyqtalyp, odan 1 mıllılıtr morfın men ishi bos 10 ampýla tabyldy. Áıel morfındi shprıtsterge quıyp satqan. Al bos qalǵan ampýlalardy dárihanaǵa tapsyryp otyrǵan.  Ustalǵannyń aıtýynsha, ol esirtkini onkolog dáriger bergen retsept boıynsha satyp alyp, sybaılastaryna taratyp otyrǵan. Aldyn ala derekter boıynsha, dáriger buryn dárilerdi ishýden bas tartqan, isik aýrýymen aýratyn áıel adamǵa, senimhatsyz retsept jazyp otyrǵan», - dedi ol.

Barlyq kúdiktiler ýaqytsha ustaý abaqtysyna qamaldy. Onkolog dárigerge qatysty esirtki zattaryn saqtaý, esepke alý jáne berý tártibin buzǵany úshin qylmystyq is qozǵaý týraly máselesi sheshilýde. Qazirgi ýaqytta esirtki zattaryn berý tártibin buzǵany úshin dárihana jumyskerlerin jaýapkershilikke tartý boıynsha jedel-tergeý is-sharalary ótkizilýde.