Dárihanadan dári izdep, daýryǵýdyń qajeti joq – Almatynyń bas dárigeri
ALMATY. KAZINFORM – Almatynyń bas dárigeri Kamaljan Nadyrov qalalyqtardy ózin-ózi emdemeýge jáne dárihanaǵa barmaýǵa shaqyrdy, dep habarlaıdy QazAqparat tilshisi.
«Qazir biz áleýmettik jelilerge monıtorıng júrgizip otyrmyz. Onda dárihanalarda dári tapshylyǵy týraly kóp jazylyp jatyr. Ásirese, vırýsqa qarsy preparattar joq deıdi. Men sizderdi mundaı jalǵan aqparattarǵa senbeýge shaqyramyn. Profılaktıka úshin dári ishýge bolmaıdy. Ol aýrýdyń aldyn almaıtynyn eskertkim keledi»,– dedi Kamaljan Nadyrov.
Sonymen qatar, ol emdi dárigerdiń keńesimen júrgizý kerektigin basa aıtty. Áıtpese, odan nátıje shyqpaıdy nemese ómirińizge qaýip tónedi.
«Sondyqtan men almatylyqtardy beker daýryǵyp, dári satyp alý úshin dárihanaǵa júgirmeýge shaqyramyn. Dárilerdi durys qoldanbasa, onyń qarsy kórsetkishteri baryn umytpaý kerek. Sondyqtan óte muqııat bolǵan abzal», - dedi ol.
